lifafe mein ek kora kaghaz paDa hua tha

lifāfe meñ ek korā kāġhaz paḌā huā thā

samajh gayā thā maiñ jo kuchh us meñ likhā huā thā

us ek din se abhī talak maiñ ḳhafā huuñ ḳhud se

bas ek din ke liye vo mujh se ḳhafā huā thā

banā diyā mujh ko devtā us kī āzarī ne

maiñ ek patthar thā rāste meñ paḌā huā thā

talāsh mujh ko añdhere meñ kar rahī thī duniyā

nazar na aayā maiñ raushnī meñ chhupā huā thā

satā rahā hai ġham-e-judā.ī se baḌh ke ye ġham

dam-e-judā.ī vo muskurā kar judā huā thā

'kamāl' mere kamāl-e-fan kī to daad diije

maiñ andar andar thā TuuTā bāhar juḌā huā thā

lifafe mein ek kora kaghaz paDa hua tha

samajh gaya tha main jo kuchh us mein likha hua tha

us ek din se abhi talak main KHafa hun KHud se

bas ek din ke liye wo mujh se KHafa hua tha

bana diya mujh ko dewta us ki aazari ne

main ek patthar tha raste mein paDa hua tha

talash mujh ko andhere mein kar rahi thi duniya

nazar na aaya main raushni mein chhupa hua tha

sata raha hai gham-e-judai se baDh ke ye gham

dam-e-judai wo muskura kar juda hua tha

'kamal' mere kamal-e-fan ki to dad dije

main andar andar tha TuTa bahar juDa hua tha