likh ke tahrir mohabbat ki miTai usne

likh ke tahrīr mohabbat kī miTā.ī us ne

haa.e kis dil se chhurī dil pe chalā.ī us ne

ḳhūb-sūrat mirī āñkhoñ kā ye dhokā hī sahī

merī tasvīr to siine se lagā.ī us ne

vo jo ab taaq pe ḳhāmosh diyā rakkhā hai

rāt-bhar kī hai añdheroñ se laḌā.ī us ne

chand lamhe hī sahī chashm-e-'ināyat se magar

donoñ 'ālam kī mujhe sair karā.ī us ne

kar ke be-laus mohabbat se kināra merī

kyā 'azīzo mire paa.ī hai ḳhudā.ī us ne

'umr-bhar kī maiñ sazā kāTne vaalā thā magar

jaane kyā soch ke de dī hai rihā.ī us ne

jis ko dekho vahī dīvāna banā phirtā hai

aisī tasvīr hai dp meñ lagā.ī us ne

haar to merī usī vaqt huī ai 'dānish'

kar liyā apnī taraf jab mirā bhaa.ī us ne

likh ke tahrir mohabbat ki miTai us ne

hae kis dil se chhuri dil pe chalai us ne

KHub-surat meri aankhon ka ye dhoka hi sahi

meri taswir to sine se lagai us ne

wo jo ab taq pe KHamosh diya rakkha hai

raat-bhar ki hai andheron se laDai us ne

chand lamhe hi sahi chashm-e-'inayat se magar

donon 'alam ki mujhe sair karai us ne

kar ke be-laus mohabbat se kinara meri

kya 'azizo mere pai hai KHudai us ne

'umr-bhar ki main saza kaTne wala tha magar

jaane kya soch ke de di hai rihai us ne

jis ko dekho wahi diwana bana phirta hai

aisi taswir hai dp mein lagai us ne

haar to meri usi waqt hui ai 'danish'

kar liya apni taraf jab mera bhai us ne