likha hai dil-zadon ka barsar-e-paikar ho jaana

likhā hai dil-zadoñ kā barsar-e-paikār ho jaanā

aur un kā ḳhud-kushī karne pe bhī tayyār ho jaanā

satīza-kārī-e-rūh-o-badan se kījiye mumkin

bhaḌakte sho.ala-hā-e-jaur kā gul-mār ho jaanā

naqāb-e-ruḳh uThā.ī kis liye itnā to farmā deñ

agar taqdīr meñ hai kushta-e-dīdār ho jaanā

nashāt-e-be-panāh-e-āshiqī hai mast-kāmī se

kisī kā manzil-e-irfāñ pe pur-asrār ho jaanā

bikhar jā.ūñgā ik lamhe meñ terī talḳh-kāmī se

nahīñ āsāñ mirī yakjā.ī phir ik baar ho jaanā

hai yūrish tīrgī kī shaam se lekin ġhanīmat hai

shab-e-tanhā.ī kā āḳhir sahar-āsār ho jaanā

kaḌaktī dhuup ke sannāTe jab hoñ maujzan 'rāhī'

ġhanīmat hai bahut sahrā-e-jāñ kā paar ho jaanā

likha hai dil-zadon ka barsar-e-paikar ho jaana

aur un ka KHud-kushi karne pe bhi tayyar ho jaana

satiza-kari-e-ruh-o-badan se kijiye mumkin

bhaDakte shoala-ha-e-jaur ka gul-mar ho jaana

naqab-e-ruKH uThai kis liye itna to farma den

agar taqdir mein hai kushta-e-didar ho jaana

nashat-e-be-panah-e-ashiqi hai mast-kaami se

kisi ka manzil-e-irfan pe pur-asrar ho jaana

bikhar jaunga ek lamhe mein teri talKH-kaami se

nahin aasan meri yakjai phir ek bar ho jaana

hai yurish tirgi ki sham se lekin ghanimat hai

shab-e-tanhai ka aaKHir sahar-asar ho jaana

kaDakti dhup ke sannaTe jab hon maujzan 'rahi'

ghanimat hai bahut sahra-e-jaan ka par ho jaana