likha hua hai mohabbaton ki zabur mein intizar karna

likhā huā hai mohabbatoñ kī zabūr meñ intizār karnā

ye pūchhnā bhī qusūr hai kis qusūr meñ intizār karnā

vo tez raftār kuchh musāfir jo jald-bāzī meñ mar ga.e haiñ

hai hashr tak ab unheñ musalsal qubūr meñ intizār karnā

nasha na karnā ki jaane ho jaa.e hijr meñ kab koī karāmat

so rah ke puure havās puure shu.ūr meñ intizār karnā

ye kyā ġhazab hai ki qurb hāsil hai par nahīñ iḳhtiyār hāsil

hai ham ko yaanī tirā hī tere huzūr meñ intizār karnā

vagarna tanhā.ī kī siyah raat dil kī bīnā.ī chhīn legī

so tum hamārā sunahrī yādoñ ke nuur meñ intizār karnā

tavīl din aur saroñ pe sūraj badan pasīne meñ ġharq yaanī

sazā hī hogā sazā kā yaum-e-nushūr meñ intizār karnā

vo ishq ho yā husūl-e-shohrat ḳhudī kā irfāñ ho yā kamānā

mujhe paḌā zindagī ke saare umuur meñ intizār karnā

har ik bayāñ meñ sunā rahā hai vo sabr karne ke hī fazā.el

ḳhatīb ko paḌ rahā hai jo shauq-e-hūr meñ intizār karnā

'nabīl' ho jaate haiñ jahāñ meñ bahut se log is liye bhī pāgal

girāñ guzartā nahīñ hai zehnī futūr meñ intizār karnā

likha hua hai mohabbaton ki zabur mein intizar karna

ye puchhna bhi qusur hai kis qusur mein intizar karna

wo tez raftar kuchh musafir jo jald-bazi mein mar gae hain

hai hashr tak ab unhen musalsal qubur mein intizar karna

nasha na karna ki jaane ho jae hijr mein kab koi karamat

so rah ke pure hawas pure shuur mein intizar karna

ye kya ghazab hai ki qurb hasil hai par nahin iKHtiyar hasil

hai hum ko yani tera hi tere huzur mein intizar karna

wagarna tanhai ki siyah raat dil ki binai chhin legi

so tum hamara sunahri yaadon ke nur mein intizar karna

tawil din aur saron pe suraj badan pasine mein gharq yani

saza hi hoga saza ka yaum-e-nushur mein intizar karna

wo ishq ho ya husul-e-shohrat KHudi ka irfan ho ya kamana

mujhe paDa zindagi ke sare umur mein intizar karna

har ek bayan mein suna raha hai wo sabr karne ke hi fazael

KHatib ko paD raha hai jo shauq-e-hur mein intizar karna

'nabil' ho jate hain jahan mein bahut se log is liye bhi pagal

giran guzarta nahin hai zehni futur mein intizar karna