likha jo yar ko mazmun-e-wasl ka kaghaz

likhā jo yaar ko mazmūn-e-vasl kā kāġhaz

havā-e-shauq meñ phir kar havā huā kāġhaz

payāmbar mujhe dushman milā nasībe se

adū ke aage mirā us ko jā diyā kāġhaz

ḳhabar hī le jo na tū us marīz-e-ulfat kī

na kyūñki pahuñche tujhe terā mubtalā kāġhaz

kiye jo soz-e-mohabbat ke kuchh raqam mazmūn

to jal ke ḳhaak vahīñ dam meñ ho gayā kāġhaz

raqīb ban ga.e ulTā javāb likhvāyā

ye le ga.e thī mire ḳhvāb-āshnā kāġhaz

hamesha siine pe haiñ gul-ruḳhoñ kī tasvīreñ

nasīb rakhtā hai bāġh-e-jahāñ meñ kyā kāġhaz

ġharaz hamīñ haiñ ki karte haiñ ḳhat pe ḳhat tahrīr

ġharaz hai kyā tujhe likkhe tirī balā kāġhaz

ġhazab huā ki hue ġhair raaz se vāqif

payāmbar kī magar jeb se girā kāġhaz

javāb saaf diyā hai ye us ne parde meñ

ki saada bhej diyā mujh ko barmalā kāġhaz

na thā raqīb kā gar ḳhauf aap ke dil meñ

to merā bhejā huā kyoñ dikhā diyā kāġhaz

butoñ se rakhiyo zabānī hī rāh-o-rasm-e-payām

likhā na diijo 'hayā' apne haath kā kāġhaz

likha jo yar ko mazmun-e-wasl ka kaghaz

hawa-e-shauq mein phir kar hawa hua kaghaz

payambar mujhe dushman mila nasibe se

adu ke aage mera us ko ja diya kaghaz

KHabar hi le jo na tu us mariz-e-ulfat ki

na kyunki pahunche tujhe tera mubtala kaghaz

kiye jo soz-e-mohabbat ke kuchh raqam mazmun

to jal ke KHak wahin dam mein ho gaya kaghaz

raqib ban gae ulTa jawab likhwaya

ye le gae thi mere KHwab-ashna kaghaz

hamesha sine pe hain gul-ruKHon ki taswiren

nasib rakhta hai bagh-e-jahan mein kya kaghaz

gharaz hamin hain ki karte hain KHat pe KHat tahrir

gharaz hai kya tujhe likkhe teri bala kaghaz

ghazab hua ki hue ghair raaz se waqif

payambar ki magar jeb se gira kaghaz

jawab saf diya hai ye us ne parde mein

ki sada bhej diya mujh ko barmala kaghaz

na tha raqib ka gar KHauf aap ke dil mein

to mera bheja hua kyon dikha diya kaghaz

buton se rakhiyo zabani hi rah-o-rasm-e-payam

likha na dijo 'haya' apne hath ka kaghaz