likha KHat use le qalam aur kaghaz

likhā ḳhat use le qalam aur kāġhaz

jale ishq-e-sozāñ se ham aur kāġhaz

na rakh dīda-e-tar pe maktūb us kā

muḳhālif haiñ aapas meñ nam aur kāġhaz

ḳhudā se bhī Dar likh na ahvāl dil kā

divāne ye soz-e-raqam aur kāġhaz

likhā safha-e-dil pe maktūb tujh ko

na thā tere laa.eq sanam aur kāġhaz

mire dil ko ai chashm naame kā us ke

ḳhush aatā hai husn-e-raqam aur kāġhaz

zarā der tere jo tham jaa.eñ aañsū

rahe haath meñ koī dam aur kāġhaz

jo kuchh safha-e-dil meñ apne hai 'joshish'

rakhe hai ye ḳhūbī to kam aur kāġhaz

likha KHat use le qalam aur kaghaz

jale ishq-e-sozan se hum aur kaghaz

na rakh dida-e-tar pe maktub us ka

muKHalif hain aapas mein nam aur kaghaz

KHuda se bhi Dar likh na ahwal dil ka

diwane ye soz-e-raqam aur kaghaz

likha safha-e-dil pe maktub tujh ko

na tha tere laeq sanam aur kaghaz

mere dil ko ai chashm name ka us ke

KHush aata hai husn-e-raqam aur kaghaz

zara der tere jo tham jaen aansu

rahe hath mein koi dam aur kaghaz

jo kuchh safha-e-dil mein apne hai 'joshish'

rakhe hai ye KHubi to kam aur kaghaz