likha tha nam jo ek sham kore kaghaz par

likhā thā naam jo ik shaam kore kāġhaz par

vo naam kyoñ huā badnām kore kāġhaz par

kiye ga.e the jo tā'mīr sang-e-marmar se

bikhar ga.e vo dar-o-bām kore kāġhaz par

gavāhī detā hai asvad bhī jis ke dāman kī

kiyā gayā use badnām kore kāġhaz par

banā thā rishta falak par jo kun ke baa'd kabhī

burā hai us kā hī anjām kore kāġhaz par

mazā to jab hai ki ehsās us talak pahuñche

likhūñ maiñ kyoñ use paiġhām kore kāġhaz par

jo apne mansab-e-‘ālī ke saath ā.eñge

likhe ga.e vo baḌe naam kore kāġhaz par

vo jis kī aas pe guzrā tamām din merā

sisak ke rah ga.ī vo shaam kore kāġhaz par

banā rahā thā vo tasvīr jis ghaḌī merī

chhalak ke rah ga.e do jaam kore kāġhaz par

gunāhgār-e-mohabbat likhā gayā mujh ko

diyā gayā mujhe in'ām kore kāġhaz par

likha tha nam jo ek sham kore kaghaz par

wo nam kyon hua badnam kore kaghaz par

kiye gae the jo ta'mir sang-e-marmar se

bikhar gae wo dar-o-baam kore kaghaz par

gawahi deta hai aswad bhi jis ke daman ki

kiya gaya use badnam kore kaghaz par

bana tha rishta falak par jo kun ke ba'd kabhi

bura hai us ka hi anjam kore kaghaz par

maza to jab hai ki ehsas us talak pahunche

likhun main kyon use paigham kore kaghaz par

jo apne mansab-e-‘ali ke sath aaenge

likhe gae wo baDe nam kore kaghaz par

wo jis ki aas pe guzra tamam din mera

sisak ke rah gai wo sham kore kaghaz par

bana raha tha wo taswir jis ghaDi meri

chhalak ke rah gae do jam kore kaghaz par

gunahgar-e-mohabbat likha gaya mujh ko

diya gaya mujhe in'am kore kaghaz par