likhti hun sab hikayaten dil ki

likhtī huuñ sab hikāyateñ dil kī

ḳhatm kab hoñ shikāyateñ dil kī

daan meñ mujh ko ġham ke sikke mile

thiiñ kuchh aisī 'ināyateñ dil kī

chehre se miT ga.ī shikan lekin

miT na pā.īñ ‘adāvateñ dil kī

na rihā.ī milī na shunvā.ī

kaisī zālim ‘adālateñ dil kī

koī aisā 'alīm-e-hāl bhī ho

buujh le jo bujhārateñ dil kī

aisī tāsīr ho zabāñ meñ mirī

rang laa.eñ sifārateñ dil kī

har ghaḌī us ke dhyān meñ gum huuñ

suntī huuñ kab bashārateñ dil kī

zo'm thā jin ko rū-shanāsī kā

paḌh na paa.e ‘ibārateñ dil kī

tere aane se ab ho kyā hāsil

Dah ga.iiñ jab 'imārateñ dil kī

ho chukī thiiñ fasīleñ bosīda

sah to letīñ qayāmateñ dil kī

ik ishāre pe bhūlā hadd-e-adab

allah allah jasārateñ dil kī

ek dil thā so vo bhī phūñk diyā

kaun kartā kifāyateñ dil kī

huzn-e-yūsuf meñ kho ga.iiñ āñkheñ

kaam aa.iiñ basārateñ dil kī

likhti hun sab hikayaten dil ki

KHatm kab hon shikayaten dil ki

dan mein mujh ko gham ke sikke mile

thin kuchh aisi 'inayaten dil ki

chehre se miT gai shikan lekin

miT na pain ‘adawaten dil ki

na rihai mili na shunwai

kaisi zalim ‘adalaten dil ki

koi aisa 'alim-e-haal bhi ho

bujh le jo bujhaaraten dil ki

aisi tasir ho zaban mein meri

rang laen sifaraten dil ki

har ghaDi us ke dhyan mein gum hun

sunti hun kab bashaaraten dil ki

zo'm tha jin ko ru-shanasi ka

paDh na pae ‘ibaraten dil ki

tere aane se ab ho kya hasil

Dah gain jab 'imaraten dil ki

ho chuki thin fasilen bosida

sah to letin qayamaten dil ki

ek ishaare pe bhula hadd-e-adab

allah allah jasaraten dil ki

ek dil tha so wo bhi phunk diya

kaun karta kifayaten dil ki

huzn-e-yusuf mein kho gain aankhen

kaam aain basaraten dil ki