likkhi hai kya hawaon pe tahrir dekhiye

likkhī hai kyā havāoñ pe tahrīr dekhiye

kyā kah rahā hai kātib-e-taqdīr dekhiye

shahr-e-vafā meñ ahl-e-hunar ahl-e-ilm kī

kitnī baḌhī hai izzat-o-tauqīr dekhiye

khañDarāt DhūñDte haiñ banāte nahīñ mahal

ahl-e-hunar kā jazba-e-ta.amīr dekhiye

lāshe galī galī meñ haiñ ujḌā huā hai ghar

azmat-nishān shahr kī tasvīr dekhiye

taa.ir lahū-luhān hai ḳhvāb-o-ḳhayāl kā

ye hai hamāre ḳhvāb kī ta.abīr dekhiye

ghar ghar meñ raushnī sī rahī aql-o-fahm kī

pahuñchī kahāñ nahīñ hai ye tanvīr dekhiye

rahbar ke naqsh-e-pā pe baḌhāte nahīñ qadam

ḳhā.if haiñ kitne raah se rahgīr dekhiye

jaarī hai raqs ab bhī yahāñ ḳhāk-o-ḳhūn kā

TuuTā kahāñ hai halqa-e-zanjīr dekhiye

suljhā sakeñge aap na 'siddīq' umr bhar

uljhī hai aisī zulf-e-girah-gīr dekhiye

likkhi hai kya hawaon pe tahrir dekhiye

kya kah raha hai katib-e-taqdir dekhiye

shahr-e-wafa mein ahl-e-hunar ahl-e-ilm ki

kitni baDhi hai izzat-o-tauqir dekhiye

khanDaraat DhunDte hain banate nahin mahal

ahl-e-hunar ka jazba-e-tamir dekhiye

lashe gali gali mein hain ujDa hua hai ghar

azmat-nishan shahr ki taswir dekhiye

tair lahu-luhan hai KHwab-o-KHayal ka

ye hai hamare KHwab ki tabir dekhiye

ghar ghar mein raushni si rahi aql-o-fahm ki

pahunchi kahan nahin hai ye tanwir dekhiye

rahbar ke naqsh-e-pa pe baDhate nahin qadam

KHaif hain kitne rah se rahgir dekhiye

jari hai raqs ab bhi yahan KHak-o-KHun ka

TuTa kahan hai halqa-e-zanjir dekhiye

suljha sakenge aap na 'siddiq' umr bhar

uljhi hai aisi zulf-e-girah-gir dekhiye