lo aaj nae andaz mein phir ek baat purani kahte hain

lo aaj na.e andāz meñ phir ek baat purānī kahte haiñ

jo aag lagā de tan-man meñ ham us ko javānī kahte haiñ

rusvā.ī tirī manzūr nahīñ iz.hār kareñ to kaise kareñ

ham apnī mohabbat kā qissa ashkoñ kī zabānī kahte haiñ

gar aañch kabhī tujh par aa.e maiñ apnī jaan luTā dūñgā

jo kaam kisī ke aa na sake us ḳhuun ko paanī kahte haiñ

hai fasl-e-bahārāñ aaj magar kal daur-e-ḳhizāñ bhī aa.egā

kyā soch ke tum itrātī ho is husn ko faanī kahte haiñ

dīvānoñ ko is se kyā matlab vo patjhaḌ ho yā mausam-e-gul

jis rut meñ yaar ho pahlū meñ us rut ko suhānī kahte haiñ

dam ghuTne lagā hai ab merā ḳhāmosh rahūñ āḳhir kab tak

rūdād-e-mohabbat ko merī sab rām-kahānī kahte haiñ

ye rog nahīñ ye jog nahīñ sanjog kī haiñ saarī bāteñ

sab log na jaane kyoñ tujh ko ik prem-dīvānī kahte haiñ

lo aaj nae andaz mein phir ek baat purani kahte hain

jo aag laga de tan-man mein hum us ko jawani kahte hain

ruswai teri manzur nahin izhaar karen to kaise karen

hum apni mohabbat ka qissa ashkon ki zabani kahte hain

gar aanch kabhi tujh par aae main apni jaan luTa dunga

jo kaam kisi ke aa na sake us KHun ko pani kahte hain

hai fasl-e-bahaaran aaj magar kal daur-e-KHizan bhi aaega

kya soch ke tum itraati ho is husn ko fani kahte hain

diwanon ko is se kya matlab wo patjhaD ho ya mausam-e-gul

jis rut mein yar ho pahlu mein us rut ko suhani kahte hain

dam ghuTne laga hai ab mera KHamosh rahun aaKHir kab tak

rudad-e-mohabbat ko meri sab ram-kahani kahte hain

ye rog nahin ye jog nahin sanjog ki hain sari baaten

sab log na jaane kyon tujh ko ek prem-diwani kahte hain