lo gunahgar hue kaisi riyazat ki thi

lo gunahgār hue kaisī riyāzat kī thī

ham ne bekār hī us but kī 'ibādat kī thī

ye jo sar par mire dastār-e-junūñ dekhte ho

maiñ ne ik chāk-garebān kī 'izzat kī thī

ḳhema-e-jāñ kī tanāboñ meñ 'ajab quvvat thī

varna us qāmat-e-zebā ne qayāmat kī thī

juute chaTḳhāte hue phirte the saḌkoñ galiyoñ

ham ne kab shahr-e-mohabbat meñ mashaqqat kī thī

āyateñ ab mirī āñkhoñ ko paḌhā kartī haiñ

maiñ ne barsoñ kisī chehre kī tilāvat kī thī

varna is ḳhaak ke tuude kī koī vaq'at thī

ham ne tā'zīm-e-badan terī badaulat kī thī

ab haiñ dīvār ke saa.e meñ to kyā jān-e-murād

dast-e-vahshat pe kabhī ham ne bhī bai'at kī thī

lo gunahgar hue kaisi riyazat ki thi

hum ne bekar hi us but ki 'ibaadat ki thi

ye jo sar par mere dastar-e-junun dekhte ho

main ne ek chaak-gareban ki 'izzat ki thi

KHema-e-jaan ki tanabon mein 'ajab quwwat thi

warna us qamat-e-zeba ne qayamat ki thi

jute chaTKHate hue phirte the saDkon galiyon

hum ne kab shahr-e-mohabbat mein mashaqqat ki thi

aayaten ab meri aankhon ko paDha karti hain

main ne barson kisi chehre ki tilawat ki thi

warna is KHak ke tude ki koi waq'at thi

hum ne ta'zim-e-badan teri badaulat ki thi

ab hain diwar ke sae mein to kya jaan-e-murad

dast-e-wahshat pe kabhi hum ne bhi bai'at ki thi