lo phir sameT liya shab ne tirgi ka libas

lo phir sameT liyā shab ne tīrgī kā libās

pahan ke sub.h chalī aa.ī raushnī kā libās

sunegā ab ye zamāna hamārā har qissa

utaar Daalā hai ab ham ne ḳhāmushī kā libās

hai raqs barsoñ se ghaḌiyoñ ke paañv par vaqt

bunā hai lamhoñ ne mil kar har ik sadī kā libās

dikhī thiiñ jhāñktī kuchh hasrateñ garebāñ se

thā muflisī ke badan pe jo bebasī kā libās

ḳhayāl lafzoñ meñ Dhal jaate haiñ salīqe se

sukūñ milā hai pahan ke suḳhan-varī kā libās

ḳhudāyā phir use sairāb kar de paanī se

nadī ke jism pe dekhā hai tishnagī kā libās

kabhī kisī ko na ehsās-e-kamtarī ho ab

ho kaash sab ko mayassar barābarī kā libās

abhī bhī Thahrī vahīñ par hai zindagī merī

pahan liyā hai ġhamoñ ne hī ab ḳhushī kā libās

kiyā karo kabhī us kā bhī shukr dil se adā

atā kiyā hai tumheñ jis ne aadmī kā libās

lo phir sameT liya shab ne tirgi ka libas

pahan ke subh chali aai raushni ka libas

sunega ab ye zamana hamara har qissa

utar Dala hai ab hum ne KHamushi ka libas

hai raqs barson se ghaDiyon ke panw par waqt

buna hai lamhon ne mil kar har ek sadi ka libas

dikhi thin jhankti kuchh hasraten gareban se

tha muflisi ke badan pe jo bebasi ka libas

KHayal lafzon mein Dhal jate hain saliqe se

sukun mila hai pahan ke suKHan-wari ka libas

KHudaya phir use sairab kar de pani se

nadi ke jism pe dekha hai tishnagi ka libas

kabhi kisi ko na ehsas-e-kamtari ho ab

ho kash sab ko mayassar barabari ka libas

abhi bhi Thahri wahin par hai zindagi meri

pahan liya hai ghamon ne hi ab KHushi ka libas

kiya karo kabhi us ka bhi shukr dil se ada

ata kiya hai tumhein jis ne aadmi ka libas