lo umr bhar ko TuT gae gulsitan se hum

lo 'umr bhar ko TuuT ga.e gulsitāñ se ham

nikle the kis 'ajīb ghaḌī āshiyāñ se ham

ye aur baat hai ki qadam ham-qadam nahīñ

pīchhe nahīñ haiñ qāfila-e-raftagāñ se ham

jab yaad ye nahīñ ki pahuñchnā thā kis jagah

ab ye bhī kyā batā.eñ chale the kahāñ se ham

rah jaa.e nā-tamām na phir dāstān-e-shauq

tum ruk ga.e jahāñ pe sunā.eñ vahāñ se ham

ġhairoñ meñ aa ke jī kī ghuTan kuchh to kam huī

apnoñ ke darmiyāñ the baḌe sargirāñ se ham

tārīḳh ham ko bhuul ga.ī hai to bhuul jaa.e

zinda raheñge tazkira-e-dīgarāñ se ham

'afzal' hamārī tarh koī kam-suḳhan na ho

hote hue zabāñ ke bhī haiñ be-zabāñ se ham

lo 'umr bhar ko TuT gae gulsitan se hum

nikle the kis 'ajib ghaDi aashiyan se hum

ye aur baat hai ki qadam ham-qadam nahin

pichhe nahin hain qafila-e-raftagan se hum

jab yaad ye nahin ki pahunchna tha kis jagah

ab ye bhi kya bataen chale the kahan se hum

rah jae na-tamam na phir dastan-e-shauq

tum ruk gae jahan pe sunaen wahan se hum

ghairon mein aa ke ji ki ghuTan kuchh to kam hui

apnon ke darmiyan the baDe sargiran se hum

tariKH hum ko bhul gai hai to bhul jae

zinda rahenge tazkira-e-digaran se hum

'afzal' hamari tarh koi kam-suKHan na ho

hote hue zaban ke bhi hain be-zaban se hum