log baiThe hain yahan hathon mein KHanjar le kar

log baiThe haiñ yahāñ hāthoñ meñ ḳhanjar le kar

tum kahāñ aa ga.e ye shāḳh-e-gul-e-tar le kar

bhīge bhīge se mire ghar ke dar-o-bām mile

shāyad aayā thā yahāñ koī samundar le kar

ab mujhe aur kisī shai kī tamannā na rahī

mutma.in huuñ tirī dahlīz kā patthar le kar

merī qismat meñ sulagne ke sivā kuchh bhī nahīñ

kyā karoge bhalā tum merā muqaddar le kar

ḳhushk hoñToñ ne mire jism kā ras chuus liyā

ab koī aa.e to kyā fā.eda sāġhar le kar

sīdhe raste koī aatā hī nahīñ merī taraf

gardish-e-vaqt bhī aatī hai to chakkar le kar

apne dil ko na kare ab koī halkā 'āzar'

varna maiñ jā.ūñgā ik bojh sā dil par le kar

log baiThe hain yahan hathon mein KHanjar le kar

tum kahan aa gae ye shaKH-e-gul-e-tar le kar

bhige bhige se mere ghar ke dar-o-baam mile

shayad aaya tha yahan koi samundar le kar

ab mujhe aur kisi shai ki tamanna na rahi

mutmain hun teri dahliz ka patthar le kar

meri qismat mein sulagne ke siwa kuchh bhi nahin

kya karoge bhala tum mera muqaddar le kar

KHushk honTon ne mere jism ka ras chus liya

ab koi aae to kya faeda saghar le kar

sidhe raste koi aata hi nahin meri taraf

gardish-e-waqt bhi aati hai to chakkar le kar

apne dil ko na kare ab koi halka 'azar'

warna main jaunga ek bojh sa dil par le kar