log hairan hain hum kyun ye kiya karte hain

log hairān haiñ ham kyuuñ ye kiyā karte haiñ

zaḳhm ko bhuul ke marham kā gilā karte haiñ

kabhī ḳhushbū kabhī jugnū kabhī sabza kabhī chāñd

ek tere liye kis kis ko ḳhafā karte haiñ

ham to Duube bhī nikal aa.e bhī phir Duube bhī

log dariyā ko kināre se takā karte haiñ

haiñ to mere hī qabīle ke ye sab log magar

merī hī raah ko dushvār kiyā karte haiñ

ham charāġh aise ki ummīd hī lau hai jin kī

roz bujhte haiñ magar roz jalā karte haiñ

vo hamārā dar-o-dīvār se mil kar ronā

chand ham-sā.e to ab tak bhī hañsā karte haiñ

log hairan hain hum kyun ye kiya karte hain

zaKHm ko bhul ke marham ka gila karte hain

kabhi KHushbu kabhi jugnu kabhi sabza kabhi chand

ek tere liye kis kis ko KHafa karte hain

hum to Dube bhi nikal aae bhi phir Dube bhi

log dariya ko kinare se taka karte hain

hain to mere hi qabile ke ye sab log magar

meri hi rah ko dushwar kiya karte hain

hum charagh aise ki ummid hi lau hai jin ki

roz bujhte hain magar roz jala karte hain

wo hamara dar-o-diwar se mil kar rona

chand ham-sae to ab tak bhi hansa karte hain