log is Dhab se qaside mein asar bandhte hain

log is Dhab se qasīde meñ asar bāñdhte haiñ

sāhab-e-sadr ke 'aiboñ ko hunar bāñdhte haiñ

ham tire shahr kā jab 'azm-e-safar bāñdhte haiñ

'ādatan kāñdhoñ pe apne ka.ī sar bāñdhte haiñ

sūkhī shāḳhoñ pe na.e barg-o-samar bāñdhte haiñ

qāfiya jab bhī nayā ahl-e-nazar bāñdhte haiñ

un muñDeroñ ke charāġhoñ kī 'ajab qismat hai

jis meñ ahbāb havāoñ kā guzar bāñdhte haiñ

maiñ 'asā le ke khaḌā huuñ to nahīñ koī harīf

kis ke hone kā fusūñ sho'bda-gar bāñdhte haiñ

vo jo vāqif nahīñ tahzīb-e-zabāñ-dānī se

apnī dastār meñ ab vo bhī guhar bāñdhte haiñ

ik ġhazal aisī jo kāġhaz ko bhigo detī hai

us meñ ham qāfiya-e-dīda-e-tar bāñdhte haiñ

in se hushiyār na.ī tarz ke jādūgar haiñ

kis safā.ī se ye logoñ kī nazar bāñdhte haiñ

ham haiñ mā’zūr-e-nazar pul terī tārīfoñ ke

ā.ina-ḳhāne ke arbāb magar bāñdhte haiñ

log is Dhab se qaside mein asar bandhte hain

sahab-e-sadr ke 'aibon ko hunar bandhte hain

hum tere shahr ka jab 'azm-e-safar bandhte hain

'adatan kandhon pe apne kai sar bandhte hain

sukhi shaKHon pe nae barg-o-samar bandhte hain

qafiya jab bhi naya ahl-e-nazar bandhte hain

un munDeron ke charaghon ki 'ajab qismat hai

jis mein ahbab hawaon ka guzar bandhte hain

main 'asa le ke khaDa hun to nahin koi harif

kis ke hone ka fusun sho'bda-gar bandhte hain

wo jo waqif nahin tahzib-e-zaban-dani se

apni dastar mein ab wo bhi guhar bandhte hain

ek ghazal aisi jo kaghaz ko bhigo deti hai

us mein hum qafiya-e-dida-e-tar bandhte hain

in se hushiyar nai tarz ke jadugar hain

kis safai se ye logon ki nazar bandhte hain

hum hain ma’zur-e-nazar pul teri tarifon ke

aaina-KHane ke arbab magar bandhte hain