log is Dhab se qaside mein utar bandhte hain

log is Dhab se qasīde meñ utar bāñdhte haiñ

sāhab-e-sadr ke aiboñ ko hunar bāñdhte haiñ

ham tire shahr kā jab azm-e-safar bāñdhte haiñ

ādatan kāñdhoñ pe apne ka.ī sar bāñdhte haiñ

sūkhī shāḳhoñ pe na.e barg-o-samar bāñdhte haiñ

qāfiya jab bhī nayā ahl-e-hunar bāñdhte haiñ

in muñDeroñ ke charāġhoñ kī ajab qismat hai

jis meñ ahbāb havāoñ kā guzar bāñdhte haiñ

maiñ ise le ke khaḌā huuñ to nahīñ koī harīf

kis ke hone kā fusūñ sho.abda-gar bāñdhte haiñ

vo jo vāqif nahīñ tahzīb-e-zabāñ-dānī se

apnī dastār meñ ab vo bhī guhar bāñdhte haiñ

ik ġhazal aisī ki kāġhaz ko bhigo detī hai

is meñ ham qāfiya-e-dīda-e-tar bāñdhte haiñ

in se hushiyār na.ī tarz ke jādūgar haiñ

kis safā.ī se ye logoñ kī nazar bāñdhte haiñ

ham haiñ ma.azūr-e-nazar, pul tirī tārīfoñ ke

ā.ina-ḳhāne ke arbāb magar bāñdhte haiñ

log is Dhab se qaside mein utar bandhte hain

sahab-e-sadr ke aibon ko hunar bandhte hain

hum tere shahr ka jab azm-e-safar bandhte hain

aadatan kandhon pe apne kai sar bandhte hain

sukhi shaKHon pe nae barg-o-samar bandhte hain

qafiya jab bhi naya ahl-e-hunar bandhte hain

in munDeron ke charaghon ki ajab qismat hai

jis mein ahbab hawaon ka guzar bandhte hain

main ise le ke khaDa hun to nahin koi harif

kis ke hone ka fusun shoabda-gar bandhte hain

wo jo waqif nahin tahzib-e-zaban-dani se

apni dastar mein ab wo bhi guhar bandhte hain

ek ghazal aisi ki kaghaz ko bhigo deti hai

is mein hum qafiya-e-dida-e-tar bandhte hain

in se hushiyar nai tarz ke jadugar hain

kis safai se ye logon ki nazar bandhte hain

hum hain mazur-e-nazar, pul teri tarifon ke

aaina-KHane ke arbab magar bandhte hain