log kahte hain ki laila parda-e-mahmil mein hai

log kahte haiñ ki lailā parda-e-mahmil meñ hai

qais kahtā hai ġhalat hai vo to mere dil meñ hai

mujh ko dā'vā thā ki terā 'ishq mere dil meñ hai

dekhtā huuñ ab tirā charchā har ik mahfil meñ hai

ik nazar dushman kī jānib ik hamārī samt hai

kuchh nahīñ mā'lūm kyā us be-vafā ke dil meñ hai

aur bhī ik haath ai qātil ḳhudā ke vāste

jaan thoḌī sī abhī baaqī tan-e-bismil meñ hai

aap puurā kar nahīñ sakte mujhe mā'lūm hai

pūchh kar kyā kījiyegā jo tamannā dil meñ hai

rāh-e-ulfat meñ chalā jaatā huuñ maiñ dīvāna-vār

kuchh nahīñ mā'lūm kitnā fāsla manzil meñ hai

ek vo din the ki jab thā ārzūoñ kā hujūm

ab ye hālat hai ki hasrat kī bhī hasrat dil meñ hai

pārsā bhī rind ban jaate haiñ aa kar is jagah

kuchh 'ajab tāsīr maiḳhāne ke āb-o-gil meñ hai

al-madad ai nāḳhudā-e-bahr-e-ulfat al-madad

fāsla do haath kā ab kashtī-o-sāhil meñ hai

faisla ho jaa.e kis kī dostī manzūr hai

maiñ bhī huuñ maujūd dushman bhī tirī mahfil meñ hai

aap agar anjān ban jaa.eñ to is kā kyā 'ilāj

aap ko mā'lūm hai jo kuchh hamāre dil meñ hai

'ishq bhī dushvār tark-e-‘ishq bhī dushvār-tar

ye dil-e-nā-‘āqibat-andesh ab mushkil meñ hai

munhasir hai marg par bīmār-e-ulfat kī shifā

chāra-gar tū kyoñ 'abas is sa'i-e-lā-hāsil meñ hai

vo yahāñ par ḳhud chale ā.eñge 'hājir' dekhnā

kuchh asar baaqī gar apne jazba-e-kāmil meñ hai

log kahte hain ki laila parda-e-mahmil mein hai

qais kahta hai ghalat hai wo to mere dil mein hai

mujh ko da'wa tha ki tera 'ishq mere dil mein hai

dekhta hun ab tera charcha har ek mahfil mein hai

ek nazar dushman ki jaanib ek hamari samt hai

kuchh nahin ma'lum kya us be-wafa ke dil mein hai

aur bhi ek hath ai qatil KHuda ke waste

jaan thoDi si abhi baqi tan-e-bismil mein hai

aap pura kar nahin sakte mujhe ma'lum hai

puchh kar kya kijiyega jo tamanna dil mein hai

rah-e-ulfat mein chala jata hun main diwana-war

kuchh nahin ma'lum kitna fasla manzil mein hai

ek wo din the ki jab tha aarzuon ka hujum

ab ye haalat hai ki hasrat ki bhi hasrat dil mein hai

parsa bhi rind ban jate hain aa kar is jagah

kuchh 'ajab tasir maiKHane ke aab-o-gil mein hai

al-madad ai naKHuda-e-bahr-e-ulfat al-madad

fasla do hath ka ab kashti-o-sahil mein hai

faisla ho jae kis ki dosti manzur hai

main bhi hun maujud dushman bhi teri mahfil mein hai

aap agar anjaan ban jaen to is ka kya 'ilaj

aap ko ma'lum hai jo kuchh hamare dil mein hai

'ishq bhi dushwar tark-e-‘ishq bhi dushwar-tar

ye dil-e-na-‘aqibat-andesh ab mushkil mein hai

munhasir hai marg par bimar-e-ulfat ki shifa

chaara-gar tu kyon 'abas is sa'i-e-la-hasil mein hai

wo yahan par KHud chale aaenge 'hajir' dekhna

kuchh asar baqi gar apne jazba-e-kaamil mein hai