log kahte hain ki mahfuz dawa ne rakkha

log kahte haiñ ki mahfūz davā ne rakkhā

dil kī dhaḌkan meñ tasalsul to ḳhudā ne rakkhā

har ghaḌī yaad meñ masrūf rahā kartī thī

naam paglī usī 'aurat kā piyā ne rakkhā

un charāġhoñ ko havā ne hī bujhāyā āḳhir

jin charāġhoñ ko munavvar bhī havā ne rakkhā

apnī dahlīz pe har lamha tamāshā ke liye

hākim-e-vaqt ko ham jaise gadā ne rakkhā

us ne rakkhā hī nahīñ merī vafā ko malhūz

ham ko pāband magar us kī jafā ne rakkhā

ham ko taslīm hai allāh kī 'azmat lekin

ham ko masrūf 'ibādat meñ jazā ne rakkhā

maut aa.ī to ye 'uqda bhī khulā hai 'dānish'

'umr ko bāñdh ke jiine kī sazā ne rakkhā

log kahte hain ki mahfuz dawa ne rakkha

dil ki dhaDkan mein tasalsul to KHuda ne rakkha

har ghaDi yaad mein masruf raha karti thi

nam pagli usi 'aurat ka piya ne rakkha

un charaghon ko hawa ne hi bujhaya aaKHir

jin charaghon ko munawwar bhi hawa ne rakkha

apni dahliz pe har lamha tamasha ke liye

hakim-e-waqt ko hum jaise gada ne rakkha

us ne rakkha hi nahin meri wafa ko malhuz

hum ko paband magar us ki jafa ne rakkha

hum ko taslim hai allah ki 'azmat lekin

hum ko masruf 'ibaadat mein jaza ne rakkha

maut aai to ye 'uqda bhi khula hai 'danish'

'umr ko bandh ke jine ki saza ne rakkha