log kahte hain waba hai ye waba ka waqt hai

log kahte haiñ vabā hai ye vabā kā vaqt hai

ye ghaḌī mushkil kī hai mushkil-kushā kā vaqt hai

sub.h-e-kāzib kī sahar-angeziyāñ daa.em vahīñ

koī dariyā hai añdherā hai ḳhudā kā vaqt hai

din nikaltā hai abhī tak ik hayāt-āsār din

āsmānoñ par sitāre haiñ sanā kā vaqt hai

shahr ko khā jaane vaalī hai ye mīnāroñ kī chup

koī naubat hai namāzoñ kī qazā kā vaqt hai

ik zarā tauzīh jis kī ho nahīñ saknī abhī

merī muTThī meñ abhī koī balā kā vaqt hai

paañv rakhte haiñ uThāte haiñ palaT aate haiñ ham

rahguzar par ek anjānī sadā kā vaqt hai

phailtī jaatī hai ik be-haiyatī chāroñ taraf

ye du'ā kā vaqt hai ye bad-du'ā kā vaqt hai

darmiyāñ meñ dūsrī sā'at kā imkāñ tak nahīñ

ibtidā kā vaqt hai aur intihā kā vaqt hai

ahl-e-duniyā par bharose kī koī vaq'at nahīñ

ye ‘iraq-e-zindagānī hai rasā kā vaqt hai

log kahte hain waba hai ye waba ka waqt hai

ye ghaDi mushkil ki hai mushkil-kusha ka waqt hai

subh-e-kazib ki sahar-angeziyan daem wahin

koi dariya hai andhera hai KHuda ka waqt hai

din nikalta hai abhi tak ek hayat-asar din

aasmanon par sitare hain sana ka waqt hai

shahr ko kha jaane wali hai ye minaron ki chup

koi naubat hai namazon ki qaza ka waqt hai

ek zara tauzih jis ki ho nahin sakni abhi

meri muTThi mein abhi koi bala ka waqt hai

panw rakhte hain uThate hain palaT aate hain hum

rahguzar par ek anjaani sada ka waqt hai

phailti jati hai ek be-haiyati chaaron taraf

ye du'a ka waqt hai ye bad-du'a ka waqt hai

darmiyan mein dusri sa'at ka imkan tak nahin

ibtida ka waqt hai aur intiha ka waqt hai

ahl-e-duniya par bharose ki koi waq'at nahin

ye ‘iraq-e-zindagani hai rasa ka waqt hai