log kyun humse shikayat ki tawaqqo rakhen

log kyuuñ ham se shikāyat kī tavaqqo rakheñ

haiñ ḳhud-āzār bhī itne ki sitamgar ro.eñ

ab to aatī haiñ kuchh is tarah tumhārī yādeñ

dhuup meñ jaise kisī chehre se bādal guzreñ

mātam-e-ġhuncha meñ ro.e haiñ nadāmat hai bahut

shiddat-e-ġham meñ rahā pās-e-tabassum na hameñ

ab ġham-e-dil kā safīna hai ki dariyā māñge

aur ye ronā hai ki aañsū bhī nahīñ āñkhoñ meñ

ham se lipTī huī talvār ho jaise yaaro

ik nayā zaḳhm sulagtā hai jo karvaT badleñ

tujh ko dekhā jo na hotā to ḳhudā kah lete

ye bhī mushkil nazar aatā hai ki patthar pūjeñ

vo karam hai tirā sāñsoñ meñ sunā.ī denā

ye sitam hai ki tujhe DhūñDh rahī haiñ āñkheñ

'hashamī' jism nazar aatā hai suulī kī tarah

jab masīhā ke liye pyaar se baazū kholīñ

log kyun hum se shikayat ki tawaqqo rakhen

hain KHud-azar bhi itne ki sitamgar roen

ab to aati hain kuchh is tarah tumhaari yaaden

dhup mein jaise kisi chehre se baadal guzren

matam-e-ghuncha mein roe hain nadamat hai bahut

shiddat-e-gham mein raha pas-e-tabassum na hamein

ab gham-e-dil ka safina hai ki dariya mange

aur ye rona hai ki aansu bhi nahin aankhon mein

hum se lipTi hui talwar ho jaise yaro

ek naya zaKHm sulagta hai jo karwaT badlen

tujh ko dekha jo na hota to KHuda kah lete

ye bhi mushkil nazar aata hai ki patthar pujen

wo karam hai tera sanson mein sunai dena

ye sitam hai ki tujhe DhunDh rahi hain aankhen

'hashami' jism nazar aata hai suli ki tarah

jab masiha ke liye pyar se bazu kholin