log milte hain bachate hue daman mujhse

log milte haiñ bachāte hue dāmāñ mujh se

jaane kyā baat hai rahte haiñ gurezāñ mujh se

'mīr'-o-'ġhālib' kā hai ābād dabistāñ mujh se

halkā halkā hai magar hai to charāġhāñ mujh se

chhīn sakte ho mire haath se shamshīr-o-sināñ

par ye maqtal ke haiñ sab naqsh-o-nigārāñ mujh se

ek ik bel ko sīñchā hai lahū se apne

muttafiq hoñ na hoñ yārān-e-gulistāñ mujh se

kah rahā hai ki sitamgar ke sitam bhī likh de

mere hāthoñ kā qalam aur qalamdāñ mujh se

maiñ ne likkhā hai qasīda na.ī sub.hoñ vaalā

marsiye ab na suno gor-e-ġharībāñ mujh se

tere ḳhvāboñ ko ḳhayāloñ meñ sajā luuñ phir se

kuchh tavaqqo to rakhā kar dil-e-nādāñ mujh se

mere dāman meñ to vahshat hai junūñ hai 'shāhid'

kyā sañvar saktī hai taqdīr-e-bayābāñ mujh se

log milte hain bachate hue daman mujh se

jaane kya baat hai rahte hain gurezan mujh se

'mir'-o-'ghaalib' ka hai aabaad dabistan mujh se

halka halka hai magar hai to charaghan mujh se

chhin sakte ho mere hath se shamshir-o-sinan

par ye maqtal ke hain sab naqsh-o-nigaran mujh se

ek ek bel ko sincha hai lahu se apne

muttafiq hon na hon yaran-e-gulistan mujh se

kah raha hai ki sitamgar ke sitam bhi likh de

mere hathon ka qalam aur qalamdan mujh se

main ne likkha hai qasida nai subhon wala

marsiye ab na suno gor-e-ghariban mujh se

tere KHwabon ko KHayalon mein saja lun phir se

kuchh tawaqqo to rakha kar dil-e-nadan mujh se

mere daman mein to wahshat hai junun hai 'shahid'

kya sanwar sakti hai taqdir-e-bayaban mujh se