log pi jaen jahan dida-e-tar ki baaten

log pī jaa.eñ jahāñ dīda-e-tar kī bāteñ

kaun suntā hai vahāñ zaḳhm-e-jigar kī bāteñ

is qadar aam huiiñ ahl-e-nazar kī bāteñ

dāstāñ ban ke rahīñ apne hī ghar kī bāteñ

kab se gardish meñ hai zarrāt-e-zamīñ kī taqdīr

aap karte haiñ sitāroñ ke safar kī bāteñ

kyā qayāmat hai ki is bāġh-e-jahāñ meñ ham ne

ġhuncha-o-gul se sunīñ barq-o-sharar kī bāteñ

bazm-e-hastī hai ki ye shahr-e-ḳhamoshāñ yaaro

gul khilātīñ hī nahīñ ahl-e-hunar kī bāteñ

'dard' ma.alūm hai anjām-e-shab-e-ġham lekin

dil ke bahlāne ko karte haiñ sahar kī bāteñ

log pi jaen jahan dida-e-tar ki baaten

kaun sunta hai wahan zaKHm-e-jigar ki baaten

is qadar aam huin ahl-e-nazar ki baaten

dastan ban ke rahin apne hi ghar ki baaten

kab se gardish mein hai zarraat-e-zamin ki taqdir

aap karte hain sitaron ke safar ki baaten

kya qayamat hai ki is bagh-e-jahan mein hum ne

ghuncha-o-gul se sunin barq-o-sharar ki baaten

bazm-e-hasti hai ki ye shahr-e-KHamoshan yaro

gul khilatin hi nahin ahl-e-hunar ki baaten

'dard' malum hai anjam-e-shab-e-gham lekin

dil ke bahlane ko karte hain sahar ki baaten