log samjhe the chhupa rakkha hai dhan gaThri mein

log samjhe the chhupā rakkhā hai dhan gaThrī meñ

ham ne to rakkhī thī māthe kī shikan gaThrī meñ

aa gayā thā hameñ kuchh chāñd sitāroñ pe taras

ham ne to bāñdh hī lenā thā gagan gaThrī meñ

ye hunar siikh leñ ye aap ke kaam aa.egā

aib hāthoñ pe rakhā karte haiñ fan gaThrī meñ

daam itne ki kisī chiiz ko chhūnā thā muhāl

bāñdh ke laayā huuñ mele se thakan gaThrī meñ

soch pe pahrā biThāyā hai kisī ne ab tak

kyā koī bāñdh ke rakh saktā hai man gaThrī meñ

vahī oḌhā diyā mayyat pe mirī apnoñ ne

maiñ ne jo rakkhā thā yādoñ kā kafan gaThrī meñ

ham se sach-much hī baḌī bhuul huī thī 'rāhat'

ham ko rakh lenā thī siine kī chubhan gaThrī meñ

log samjhe the chhupa rakkha hai dhan gaThri mein

hum ne to rakkhi thi mathe ki shikan gaThri mein

aa gaya tha hamein kuchh chand sitaron pe taras

hum ne to bandh hi lena tha gagan gaThri mein

ye hunar sikh len ye aap ke kaam aaega

aib hathon pe rakha karte hain fan gaThri mein

dam itne ki kisi chiz ko chhuna tha muhaal

bandh ke laya hun mele se thakan gaThri mein

soch pe pahra biThaya hai kisi ne ab tak

kya koi bandh ke rakh sakta hai man gaThri mein

wahi oDha diya mayyat pe meri apnon ne

main ne jo rakkha tha yaadon ka kafan gaThri mein

hum se sach-much hi baDi bhul hui thi 'rahat'

hum ko rakh lena thi sine ki chubhan gaThri mein