log to log the ji bhar ke KHasara karte

log to log the jī bhar ke ḳhasāra karte

kam se kam tum to na nuqsān hamārā karte

kar to lenā thā tire saath guzāra lekin

ab tire saath bhī karte to guzāra karte

kaisā ilzām sar-e-mauj-e-balā-ḳhez ki ham

ho ga.e ġharq kināroñ se kināra karte

kar liyā thā to tavaqqo' nahīñ rakhte ham se

'ishq thā qarz nahīñ thā ki utārā karte

ek bas ham hī mayassar the hameñ girte samay

ḳhud ko ab aasrā dete ki sahārā karte

'ishq har haal meñ bas kār-e-ziyāñ thā lekin

ham koī kaam bhī karte to ḳhasāra karte

log to log the ji bhar ke KHasara karte

kam se kam tum to na nuqsan hamara karte

kar to lena tha tere sath guzara lekin

ab tere sath bhi karte to guzara karte

kaisa ilzam sar-e-mauj-e-bala-KHez ki hum

ho gae gharq kinaron se kinara karte

kar liya tha to tawaqqo' nahin rakhte hum se

'ishq tha qarz nahin tha ki utara karte

ek bas hum hi mayassar the hamein girte samay

KHud ko ab aasra dete ki sahaara karte

'ishq har haal mein bas kar-e-ziyan tha lekin

hum koi kaam bhi karte to KHasara karte