log uD ke ja pahonche be-karan KHalaon mein

log uḌ ke jā pahoñche be-karāñ ḳhalāoñ meñ

ham asiir haiñ ab tak jahl kī guphāoñ meñ

be-sabab nahīñ ghar meñ tīrgī huī hogī

chāñd chhup gayā hogā zulf kī ghaTāoñ meñ

ham amal se haiñ ḳhālī yūñhī hogī pāmālī

dhūñDiye na tāsīreñ be-asar duāoñ meñ

ye tasalsul-e-tūfāñ ye azaab lahroñ kā

kaun sī bashārat hai chīḳhtī havāoñ meñ

kyā yahāñ amīroñ ke khel hone vaale haiñ

uḌ rahe haiñ ġhubbāre shahr kī fazāoñ meñ

kisht-e-za.afrāñ ho kar har-nafas mahak uTThe

mere pyaar kī ḳhushbū ghol do havāoñ meñ

qaum ke safīne kā ab ḳhudā hī hāfiz hai

iḳhtilāf barpā hai aaj nā-ḳhudāoñ meñ

kal thī jin kī muTThī meñ gardish-e-zamāna bhī

vaqt kī haiñ zanjīreñ aaj un ke paañv meñ

ham sharīf-zāde haiñ be-hayā nahīñ lekin

sar chhupā.eñge kaise muḳhtasar ridāoñ meñ

nafratoñ ke saudāgar parcham-e-amāñ le kar

pyaar bāñTne nikle 'shād' gaañv gaañv meñ

log uD ke ja pahonche be-karan KHalaon mein

hum asir hain ab tak jahl ki guphaon mein

be-sabab nahin ghar mein tirgi hui hogi

chand chhup gaya hoga zulf ki ghaTaon mein

hum amal se hain KHali yunhi hogi pamali

dhunDiye na tasiren be-asar duaon mein

ye tasalsul-e-tufan ye azab lahron ka

kaun si bashaarat hai chiKHti hawaon mein

kya yahan amiron ke khel hone wale hain

uD rahe hain ghubbare shahr ki fazaon mein

kisht-e-zafran ho kar har-nafas mahak uTThe

mere pyar ki KHushbu ghol do hawaon mein

qaum ke safine ka ab KHuda hi hafiz hai

iKHtilaf barpa hai aaj na-KHudaon mein

kal thi jin ki muTThi mein gardish-e-zamana bhi

waqt ki hain zanjiren aaj un ke panw mein

hum sharif-zade hain be-haya nahin lekin

sar chhupaenge kaise muKHtasar ridaon mein

nafraton ke saudagar parcham-e-aman le kar

pyar banTne nikle 'shad' ganw ganw mein