logon ke pas dard ki daulat nahin rahi

logoñ ke paas dard kī daulat nahīñ rahī

ya.anī kisī ko koī zarūrat nahīñ rahī

masrūf is qadar kiyā us kī talāsh ne

mujh ko to ḳhud se milne kī fursat nahīñ rahī

duniyā ne harf harf meñ taqsīm kar diyā

ab zindagī kisī se ibārat nahīñ rahī

achchhā huā ki tark-e-ta.alluq hī kar liyā

āñkhoñ ko intizār kī zahmat nahīñ rahī

maiñ kyā karūñ dimāġh ne taḳhta ulaT diyā

ab dil pe dost terī hukūmat nahīñ rahī

gum ho ga.e haiñ saare salīqe vafāoñ ke

ab is jahāñ meñ rasm-e-mohabbat nahīñ rahī

rusvā.iyoñ ne ghar kī vo sar hī jhukā diyā

yuuñ shahar meñ vo ūñchī imārat nahīñ rahī

'ruḳhsār' muflisī ke karishme ajiib haiñ

ġhurbat meñ dostī bhī salāmat nahīñ rahī

logon ke pas dard ki daulat nahin rahi

yani kisi ko koi zarurat nahin rahi

masruf is qadar kiya us ki talash ne

mujh ko to KHud se milne ki fursat nahin rahi

duniya ne harf harf mein taqsim kar diya

ab zindagi kisi se ibarat nahin rahi

achchha hua ki tark-e-talluq hi kar liya

aankhon ko intizar ki zahmat nahin rahi

main kya karun dimagh ne taKHta ulaT diya

ab dil pe dost teri hukumat nahin rahi

gum ho gae hain sare saliqe wafaon ke

ab is jahan mein rasm-e-mohabbat nahin rahi

ruswaiyon ne ghar ki wo sar hi jhuka diya

yun shahar mein wo unchi imarat nahin rahi

'ruKHsar' muflisi ke karishme ajib hain

ghurbat mein dosti bhi salamat nahin rahi