lughat ka pech ye mujhko KHarab lagta hai

luġhat kā pech ye mujh ko ḳharāb lagtā hai

javānī lagtī hai jabki shabāb lagtā hai

vo muskurā.e to kyā jaane kyā qayāmat ho

hasīn itnā jab us kā itaab lagtā hai

ye kapkapāte hue lab jhukī huī palkeñ

mire savāl kā shāyad javāb lagtā hai

tumhāre husn kī tārīf-e-muḳhtasar ye hai

hujūm-e-gul meñ shagufta gulāb lagtā hai

tū dil pe Thes lagā jā koī sadā ke liye

ye terā roz bichhaḌnā azaab lagtā hai

mohabbatoñ kā ḳhazāna jise vo kahte haiñ

mujhe habāb ke aage habāb lagtā hai

sazā-e-jurm-e-mohabbat vo de ke pachhtā.e

mirā gunāh ab un ko savāb lagtā hai

mubālaġha hai ki hai 'sarfarāz' husn-e-nazar

kabhī vo phuul kabhī māhtāb lagtā hai

lughat ka pech ye mujh ko KHarab lagta hai

jawani lagti hai jabki shabab lagta hai

wo muskurae to kya jaane kya qayamat ho

hasin itna jab us ka itab lagta hai

ye kapkapate hue lab jhuki hui palken

mere sawal ka shayad jawab lagta hai

tumhaare husn ki tarif-e-muKHtasar ye hai

hujum-e-gul mein shagufta gulab lagta hai

tu dil pe Thes laga ja koi sada ke liye

ye tera roz bichhaDna azab lagta hai

mohabbaton ka KHazana jise wo kahte hain

mujhe habab ke aage habab lagta hai

saza-e-jurm-e-mohabbat wo de ke pachhtae

mera gunah ab un ko sawab lagta hai

mubaalagha hai ki hai 'sarfaraaz' husn-e-nazar

kabhi wo phul kabhi mahtab lagta hai