luT jaegi hayat na thi ye KHabar mujhe

luT jā.egī hayāt na thī ye ḳhabar mujhe

ronā paḌegā hijr meñ shām-o-sahar mujhe

uThtā huuñ baar baar kaleje ko thaam kar

dil meñ chubho rahā hai koī neshtar mujhe

duniyā meñ āñsuoñ kī basā kar chalī ga.iiñ

achchhā diyā vafāoñ kā merī samar mujhe

bas ai junūn-e-shauq bahut naam pā chukā

lillāh aur dahr meñ rusvā na kar mujhe

jalve sameT ke dīda-e-hairāñ meñ rah na jaa.eñ

altāf-e-be-panāh se dekhā na kar mujhe

ishq-o-junūñ meñ ziist ko barbād kar chukā

kahte haiñ log 'maz.har'-e-āshufta-sar mujhe

luT jaegi hayat na thi ye KHabar mujhe

rona paDega hijr mein sham-o-sahar mujhe

uThta hun bar bar kaleje ko tham kar

dil mein chubho raha hai koi neshtar mujhe

duniya mein aansuon ki basa kar chali gain

achchha diya wafaon ka meri samar mujhe

bas ai junun-e-shauq bahut nam pa chuka

lillah aur dahr mein ruswa na kar mujhe

jalwe sameT ke dida-e-hairan mein rah na jaen

altaf-e-be-panah se dekha na kar mujhe

ishq-o-junun mein zist ko barbaad kar chuka

kahte hain log 'mazhar'-e-ashufta-sar mujhe