luTaun mastiyan sarsabz rahguzar ki tarah

luTā.ūñ mastiyāñ sarsabz rahguzar kī tarah

diloñ ko rāhateñ baḳhshūñ hare shajar kī tarah

kare vo raat kī mānind daaġh daaġh mujhe

maiñ rañg rañg karūñgā use sahar kī tarah

vo dhuup hai ki havā phuul hai ki shabnam hai

kabhī to dekh use sāhib-e-nazar kī tarah

vo bevafā mujhe dil se nikāl kar dekhe

maiñ us ke zehn meñ taḌpūñ sadā sharar kī tarah

ye roz-o-shab kā tasalsul batā rahā hai mujhe

hai be-qarār mashiyyat abhī bashar kī tarah

payambaroñ ke sahīfe haiñ e'timād mirā

jahān-e-zīst meñ phailuñgā bahr-o-bar kī tarah

sitam hai 'kāzmī' ghar meñ bhī ab sabhī lamhe

garāñ guzarte haiñ ehsās par safar kī tarah

luTaun mastiyan sarsabz rahguzar ki tarah

dilon ko rahaten baKHshun hare shajar ki tarah

kare wo raat ki manind dagh dagh mujhe

main rang rang karunga use sahar ki tarah

wo dhup hai ki hawa phul hai ki shabnam hai

kabhi to dekh use sahib-e-nazar ki tarah

wo bewafa mujhe dil se nikal kar dekhe

main us ke zehn mein taDpun sada sharar ki tarah

ye roz-o-shab ka tasalsul bata raha hai mujhe

hai be-qarar mashiyyat abhi bashar ki tarah

payambaron ke sahife hain e'timad mera

jahan-e-zist mein phailunga bahr-o-bar ki tarah

sitam hai 'kazmi' ghar mein bhi ab sabhi lamhe

garan guzarte hain ehsas par safar ki tarah