lutf aa jae mohabbat ka meri jaan mujhko

lutf aa jaa.e mohabbat kā mirī jaañ mujh ko

ho vahī dard tujhe jo hai sitam-rāñ mujh ko

tum agar jalva-numā ho to ho vahdat kasrat

ā.ina-ḳhāna nazar aa.e paristāñ mujh ko

chūste haiñ dahan-e-zaḳhm maze le le kar

lab-e-ma.ashūq hai us tiir kā paikāñ mujh ko

dil-e-afsurda ne afsos kahīñ kā na rakhā

sehn-e-gulzār se achchhā hai bayābāñ mujh ko

haa.e shor-afganī-e-husn-e-malīh-e-qātil

har jarāhat kī sadā hai ki namak-dāñ mujh ko

kab uThātā hai naqāb-e-ruḳh-e-zebā vo shoḳh

bas pareshāñ na kar ai ḳhvāb-e-pareshāñ mujh ko

fikr thī roz-e-azal deñ ġham-e-ulfat kis ko

haath phailā ke pukārā dil-e-insāñ mujh ko

ghar meñ baiThā na gayā raah meñ Thahrā na gayā

le gayā shauq na jaanā thā jahāñ vaañ mujh ko

yā sikhānī na thī us shoḳh ko ye tarz-e-jafā

yā na denā thā ilāhī dil-e-nālāñ mujh ko

ek hī daur meñ maiñ gir ke na sañbhlā saaqī

gardish-e-jām huī gardish-e-daurāñ mujh ko

baat meñ TuuT gayā 'mehr' milā thā shāyad

dil bhī ho kar kisī bad-ahd kā paimāñ mujh ko

lutf aa jae mohabbat ka meri jaan mujh ko

ho wahi dard tujhe jo hai sitam-ran mujh ko

tum agar jalwa-numa ho to ho wahdat kasrat

aaina-KHana nazar aae paristan mujh ko

chuste hain dahan-e-zaKHm maze le le kar

lab-e-mashuq hai us tir ka paikan mujh ko

dil-e-afsurda ne afsos kahin ka na rakha

sehn-e-gulzar se achchha hai bayaban mujh ko

hae shor-afgani-e-husn-e-malih-e-qatil

har jarahat ki sada hai ki namak-dan mujh ko

kab uThata hai naqab-e-ruKH-e-zeba wo shoKH

bas pareshan na kar ai KHwab-e-pareshan mujh ko

fikr thi roz-e-azal den gham-e-ulfat kis ko

hath phaila ke pukara dil-e-insan mujh ko

ghar mein baiTha na gaya rah mein Thahra na gaya

le gaya shauq na jaana tha jahan wan mujh ko

ya sikhani na thi us shoKH ko ye tarz-e-jafa

ya na dena tha ilahi dil-e-nalan mujh ko

ek hi daur mein main gir ke na sanbhla saqi

gardish-e-jam hui gardish-e-dauran mujh ko

baat mein TuT gaya 'mehr' mila tha shayad

dil bhi ho kar kisi bad-ahd ka paiman mujh ko