lutf duniya to faqat dida-e-namnak mein hai

lutf duniyā to faqat dīda-e-namnāk meñ hai

shaiḳh sāhab kī nazar aaj bhī aflāk meñ hai

jis ne ta.amīr kiyā mujh ko lahū hāthoñ se

ḳhaak ho jā.ūñ ki vo shaḳhs bhī ab ḳhaak meñ hai

mujh ko majbūr kiyā hai mirī majbūrī ne

aaj bhī merī anā kāġhzī poshāk meñ hai

maiñ jo bīmār huā us ne ayādat kī hai

ḳhū-e-rahmat bhī usī qātil-e-saffāk meñ hai

ai dil-e-hijr-zada mujh ko na rusvā karnā

sharm thoḌī sī abhī lahja-e-bebāk meñ hai

merī rusvā.ī meñ shāmil nahīñ mere chehre

hākim-e-shahr magar aaj bhī is taak meñ hai

shahr-e-be-mehr meñ zinda thā faqat maiñ 'sāhil'

mere ehsās kā qātil mirī poshāk meñ hai

lutf duniya to faqat dida-e-namnak mein hai

shaiKH sahab ki nazar aaj bhi aflak mein hai

jis ne tamir kiya mujh ko lahu hathon se

KHak ho jaun ki wo shaKHs bhi ab KHak mein hai

mujh ko majbur kiya hai meri majburi ne

aaj bhi meri ana kaghzi poshak mein hai

main jo bimar hua us ne ayaadat ki hai

KHu-e-rahmat bhi usi qatil-e-saffak mein hai

ai dil-e-hijr-zada mujh ko na ruswa karna

sharm thoDi si abhi lahja-e-bebak mein hai

meri ruswai mein shamil nahin mere chehre

hakim-e-shahr magar aaj bhi is tak mein hai

shahr-e-be-mehr mein zinda tha faqat main 'sahil'

mere ehsas ka qatil meri poshak mein hai