lutf ka rabt hai koi na jafa ka rishta

lutf kā rabt hai koī na jafā kā rishta

dil se kuchh duur hai zālim kī anā kā rishta

dast-e-īsā bhī vahī bāzū-e-qātil bhī vahī

kitnā nāzuk hai charāġhoñ se havā kā rishta

jabr-e-hālāt kaho ġham kī mukāfāt kaho

TuuT bhī jaatā hai hoñToñ se navā kā rishta

sochiye to sabhī apne haiñ koī ġhair nahīñ

hākim-e-shahr se hai jurm-o-sazā kā rishta

manzar-e-zīst meñ kuchh rañg to bhar detā hai

ḳhār-zāroñ se kisī ābla-pā kā rishta

phuul nāyāb sahī zaḳhm to nāyāb nahīñ

aaj bhī dil se vahī āb-o-havā kā rishta

kyā kareñ rasm-e-zamāna kī shikāyat 'tābāñ'

dard se rakhte haiñ ham log sadā kā rishta

lutf ka rabt hai koi na jafa ka rishta

dil se kuchh dur hai zalim ki ana ka rishta

dast-e-isa bhi wahi bazu-e-qatil bhi wahi

kitna nazuk hai charaghon se hawa ka rishta

jabr-e-haalat kaho gham ki mukafat kaho

TuT bhi jata hai honTon se nawa ka rishta

sochiye to sabhi apne hain koi ghair nahin

hakim-e-shahr se hai jurm-o-saza ka rishta

manzar-e-zist mein kuchh rang to bhar deta hai

KHar-zaron se kisi aabla-pa ka rishta

phul nayab sahi zaKHm to nayab nahin

aaj bhi dil se wahi aab-o-hawa ka rishta

kya karen rasm-e-zamana ki shikayat 'taban'

dard se rakhte hain hum log sada ka rishta