lutf pahchan ka bhi to lo ajnabi

lutf pahchān kā bhī to lo ajnabī

ham se mil mil ke yuuñ na bano ajnabī

ajnabī-pan hai sheva mire shahr kā

aa.e ho jo yahāñ ban raho ajnabī

bhiiḌ hī se muḳhātab ho tum der se

ḳhud se bhī to kabhī kuchh kaho ajnabī

sah na pāoge majlis kī tanhā.iyāñ

is se behtar hai tanhā raho ajnabī

TūTnā hī habāboñ kī taqdīr hai

in marāsim ko itnā na ro ajnabī

ham shanāsā.iyoñ ke bharam meñ jiye

khul na paayā ki āḳhir haiñ do ajnabī

zindagī hai ki bastī kisī ġhair kī

tum shanāsā sahī phir bhī ho ajnabī

lutf pahchan ka bhi to lo ajnabi

hum se mil mil ke yun na bano ajnabi

ajnabi-pan hai shewa mere shahr ka

aae ho jo yahan ban raho ajnabi

bhiD hi se muKHatab ho tum der se

KHud se bhi to kabhi kuchh kaho ajnabi

sah na paoge majlis ki tanhaiyan

is se behtar hai tanha raho ajnabi

TuTna hi hababon ki taqdir hai

in marasim ko itna na ro ajnabi

hum shanasaiyon ke bharam mein jiye

khul na paya ki aaKHir hain do ajnabi

zindagi hai ki basti kisi ghair ki

tum shanasa sahi phir bhi ho ajnabi