lu hi lu thi saba to thi hi nahin

lū hī lū thī sabā to thī hī nahīñ

ziist rāhat-fazā to thī hī nahīñ

us kī miTTī meñ ḳhū thī kuufe kī

us meñ bū-e-vafā to thī hī nahīñ

saath rah kar bhī itnī duurī he

vasl jaisī sazā to thī hī nahīñ

TuuT kar bhī maiñ kahkashāñ hī huuñ

TūTne meñ fanā to thī hī nahīñ

sirf malba paḌā thā duniyā kā

dil meñ koī duā to thī hī nahīñ

apnī sūrat se Dar gayā thā koī

aa.ine kī ḳhatā to thī hī nahīñ

vo samar-bār peḌ thā lekin

us ke saa.e meñ jā to thī hī nahīñ

jism jabran kisī se bāñdhā hai

is meñ dil kī razā to thī hī nahīñ

us ne tohfe meñ hijr bhejā hai

yeh aziyyat ravā to thī hī nahīñ

aadmī thā ḳhudā na thā 'fauzī'

ziist us kī atā to thī hī nahīñ

lu hi lu thi saba to thi hi nahin

zist rahat-faza to thi hi nahin

us ki miTTi mein KHu thi kufe ki

us mein bu-e-wafa to thi hi nahin

sath rah kar bhi itni duri he

wasl jaisi saza to thi hi nahin

TuT kar bhi main kahkashan hi hun

TuTne mein fana to thi hi nahin

sirf malba paDa tha duniya ka

dil mein koi dua to thi hi nahin

apni surat se Dar gaya tha koi

aaine ki KHata to thi hi nahin

wo samar-bar peD tha lekin

us ke sae mein ja to thi hi nahin

jism jabran kisi se bandha hai

is mein dil ki raza to thi hi nahin

us ne tohfe mein hijr bheja hai

yeh aziyyat rawa to thi hi nahin

aadmi tha KHuda na tha 'fauzi'

zist us ki ata to thi hi nahin