luTne ko to gham-e-dahr ne luTa ab tak

lūTne ko to ġham-e-dahr ne luuTā ab tak

maiñ vo shīsha huuñ ki patthar se na TuuTā ab tak

zahr detī rahī har gaam pe duniyā mujh ko

dāman-e-zīst to hāthoñ se na chhūTā ab tak

un se mil aaya magar soch rahā huuñ ab bhī

naġhma kyoñ bikhrā hai kyoñ saaz hai TuuTā ab tak

kyā kiyā tum ne jo is tarah ḳhajil hote ho

merā ehsās thā jis ne mujhe luuTā ab tak

dasht-e-pur-ḳhār hai kahte haiñ ye duniyā jis ko

aabla dil kā magar phir bhī na phūTā ab tak

raah to raah hai manzil bhī chhuTī hai pīchhe

gardish-e-vaqt tirā saath na chhūTā ab tak

mauj-o-girdāb se shikva to nahīñ koī 'sabā'

mujh ko be-mehrī-e-sāhil ne hī luuTā ab tak

luTne ko to gham-e-dahr ne luTa ab tak

main wo shisha hun ki patthar se na TuTa ab tak

zahr deti rahi har gam pe duniya mujh ko

daman-e-zist to hathon se na chhuTa ab tak

un se mil aaya magar soch raha hun ab bhi

naghma kyon bikhra hai kyon saz hai TuTa ab tak

kya kiya tum ne jo is tarah KHajil hote ho

mera ehsas tha jis ne mujhe luTa ab tak

dasht-e-pur-KHar hai kahte hain ye duniya jis ko

aabla dil ka magar phir bhi na phuTa ab tak

rah to rah hai manzil bhi chhuTi hai pichhe

gardish-e-waqt tera sath na chhuTa ab tak

mauj-o-girdab se shikwa to nahin koi 'saba'

mujh ko be-mehri-e-sahil ne hi luTa ab tak