ma-siwa se kahin begana banaya hota

mā-sivā se kahīñ begāna banāyā hotā

apne hī husn kā dīvāna banāyā hotā

jaam sāġhar subū ḳhum-ḳhāna banāyā hotā

zarf-e-dil dekh ke paimāna banāyā hotā

lau lagātā na kisī ġhair se ai sham-e-husn

tum ne gar apnā hī parvāna banāyā hotā

merī mahrūmī-e-qismat ko jo sun paatā raqīb

utnī hī baat kā afsāna banāyā hotā

pahle allāh mujhe zabt kī quvvat detā

phir rahīn-e-ġham-e-jānāna na banāyā hotā

un ke hāthoñ pe pahuñchne kā sharaf hī miltā

merī miTTī se jo paimāna banāyā hotā

kaash allāh kā ghar jaan ke 'sho.ala' tum ne

ka.aba-e-dil ko kalīsā na banāyā hotā

ma-siwa se kahin begana banaya hota

apne hi husn ka diwana banaya hota

jam saghar subu KHum-KHana banaya hota

zarf-e-dil dekh ke paimana banaya hota

lau lagata na kisi ghair se ai sham-e-husn

tum ne gar apna hi parwana banaya hota

meri mahrumi-e-qismat ko jo sun pata raqib

utni hi baat ka afsana banaya hota

pahle allah mujhe zabt ki quwwat deta

phir rahin-e-gham-e-jaanana na banaya hota

un ke hathon pe pahunchne ka sharaf hi milta

meri miTTi se jo paimana banaya hota

kash allah ka ghar jaan ke 'shoala' tum ne

kaba-e-dil ko kalisa na banaya hota