maal-e-shab ba-unwan-e-sahar kahna hi paDta hai

ma.āl-e-shab ba-unvān-e-sahar kahnā hī paḌtā hai

koī rasta ho us kī rahguzar kahnā hī paḌtā hai

vo sannāTā ḳhirad kahtī hai jis ko ghar kī vīrānī

use bhī raunaq-e-dīvār-o-dar kahnā hī paḌtā hai

sulag jaatā hai siina jis kī ThanDī sarsarāhaT se

us ātish ko bhī yaañ bād-e-sahar kahnā hī paḌtā hai

sharīk-e-rahguzar koī nahīñ hotā magar phir bhī

yahāñ har rāh-rau ko ham-safar kahnā hī paḌtā hai

musallam gul-kadoñ kī lāla-sāmānī magar hamdam

sharār-o-barq ko bhī mo'atabar kahnā hī paḌtā hai

ba-har-sūrat guzar jaatī hai jo dil par guzartī hai

magar phir apne ghar ko apnā ghar kahnā hī paḌtā hai

kuchh aise bhī fasāne mahfiloñ meñ chheḌe jaate haiñ

ki jin ko ehtiyātan muḳhtasar kahnā hī paḌtā hai

ḳhamoshī ek majbūrī takallum ek mahrūmī

kisī se kah nahīñ sakte magar kahnā hī paḌtā hai

maal-e-shab ba-unwan-e-sahar kahna hi paDta hai

koi rasta ho us ki rahguzar kahna hi paDta hai

wo sannaTa KHirad kahti hai jis ko ghar ki virani

use bhi raunaq-e-diwar-o-dar kahna hi paDta hai

sulag jata hai sina jis ki ThanDi sarsarahaT se

us aatish ko bhi yan baad-e-sahar kahna hi paDta hai

sharik-e-rahguzar koi nahin hota magar phir bhi

yahan har rah-rau ko ham-safar kahna hi paDta hai

musallam gul-kadon ki lala-samani magar hamdam

sharar-o-barq ko bhi mo'atabar kahna hi paDta hai

ba-har-surat guzar jati hai jo dil par guzarti hai

magar phir apne ghar ko apna ghar kahna hi paDta hai

kuchh aise bhi fasane mahfilon mein chheDe jate hain

ki jin ko ehtiyatan muKHtasar kahna hi paDta hai

KHamoshi ek majburi takallum ek mahrumi

kisi se kah nahin sakte magar kahna hi paDta hai