maal-e-zindagani imbisat-e-anjuman bhi hai

ma.āl-e-zindagānī imbisāt-e-anjuman bhī hai

magar is rahguzar meñ manzil-e-dār-o-rasan bhī hai

faqat gul hī nahīñ kāñTe bhī haiñ sarmāya-e-gulshan

inhīñ ke rabt se ta.abīr taz.īn-e-chaman bhī hai

zarūrī amr ta.amīr-e-nasheman hai chaman vaalo

magar muhtāj-e-ārā.ish gulistān-e-vatan bhī hai

zamāna mo'tarif ab tak hai mere kārnāmoñ kā

mirī mīrās meñ talvār bhī hai aur kafan bhī hai

payām-e-asr detā huuñ maiñ āhang-e-ḳhumistāñ meñ

sharāb-e-nau bhī hai sāġhar meñ sahbā-e-kuhan bhī hai

ḳhirad-mando haqīqat khul to jaatī hosh-mandī kī

magar haa.il kisī had tak mirā dīvāna-pan bhī hai

vo aalam jo kahā jaatā hai duniyā-e-ravādārī

vahāñ mujrim janāb-e-shaiḳh bhī haiñ barhaman bhī hai

usī mai-ḳhvār kī azmat hai saaqī kī nigāhoñ meñ

jise 'zamzam' gavāra talḳhī-e-kām-o-dahan bhī hai

maal-e-zindagani imbisat-e-anjuman bhi hai

magar is rahguzar mein manzil-e-dar-o-rasan bhi hai

faqat gul hi nahin kanTe bhi hain sarmaya-e-gulshan

inhin ke rabt se tabir tazin-e-chaman bhi hai

zaruri amr tamir-e-nasheman hai chaman walo

magar muhtaj-e-araish gulistan-e-watan bhi hai

zamana mo'tarif ab tak hai mere karnamon ka

meri miras mein talwar bhi hai aur kafan bhi hai

payam-e-asr deta hun main aahang-e-KHumistan mein

sharab-e-nau bhi hai saghar mein sahba-e-kuhan bhi hai

KHirad-mando haqiqat khul to jati hosh-mandi ki

magar hail kisi had tak mera diwana-pan bhi hai

wo aalam jo kaha jata hai duniya-e-rawadari

wahan mujrim janab-e-shaiKH bhi hain barhaman bhi hai

usi mai-KHwar ki azmat hai saqi ki nigahon mein

jise 'zamzam' gawara talKHi-e-kaam-o-dahan bhi hai