mah-paron mein rahe zohra-jamalon mein rahe

māh-pāroñ meñ rahe zohra-jamāloñ meñ rahe

ham bahar-hāl tire chāhne vāloñ meñ rahe

mere dam tak to farozāñ rahī qindīl-e-vafā

kyā mire baad bhī insān ujāloñ meñ rahe

ma.abad-e-shab meñ tapā.e hue gulnār badan

muddatoñ aag kī mānind ḳhayāloñ meñ rahe

aur kis se ḳhalish-e-dil kā fasāna kahte

jab ki ham ḳhud bhī tumheñ pūjne vāloñ meñ rahe

ham ne paayā hai har ik Thos haqīqat se ḳhirāj

vo shahanshāh nahīñ ham jo misāloñ meñ rahe

vādī-e-gul se churā.e hue lamhe 'ishrat'

Tiis ban ban ke mirī ruuh ke chhāloñ meñ rahe

mah-paron mein rahe zohra-jamalon mein rahe

hum bahar-haal tere chahne walon mein rahe

mere dam tak to farozan rahi qindil-e-wafa

kya mere baad bhi insan ujalon mein rahe

mabad-e-shab mein tapae hue gulnar badan

muddaton aag ki manind KHayalon mein rahe

aur kis se KHalish-e-dil ka fasana kahte

jab ki hum KHud bhi tumhein pujne walon mein rahe

hum ne paya hai har ek Thos haqiqat se KHiraj

wo shahanshah nahin hum jo misalon mein rahe

wadi-e-gul se churae hue lamhe 'ishrat'

Tis ban ban ke meri ruh ke chhaalon mein rahe