mahaul-e-dil-e-zar abhi kya tha abhi kya hai

māhaul-e-dil-e-zār abhī kyā thā abhī kyā hai

ye shahr bhī hairat-kada-e-hosh-rubā hai

ik vo haiñ ki asbāb-e-zamāna haiñ mulāzim

ik ham ki mayassar na davā hai na du'ā hai

sab kaam dalīloñ se nahīñ chalte jahāñ meñ

gar ham ko yaqīñ hai ki ḳhudā hai to ḳhudā hai

tasvīr-e-mukammal huuñ magar merā musavvir

lagtā hai yahāñ rakh ke mujhe bhuul gayā hai

bekār hai dīvāroñ se sar phoḌnā 'ḳhālid'

kuchh dād-rasī ho to shikāyat bhī bajā hai

mahaul-e-dil-e-zar abhi kya tha abhi kya hai

ye shahr bhi hairat-kada-e-hosh-ruba hai

ek wo hain ki asbab-e-zamana hain mulazim

ek hum ki mayassar na dawa hai na du'a hai

sab kaam dalilon se nahin chalte jahan mein

gar hum ko yaqin hai ki KHuda hai to KHuda hai

taswir-e-mukammal hun magar mera musawwir

lagta hai yahan rakh ke mujhe bhul gaya hai

bekar hai diwaron se sar phoDna 'KHalid'

kuchh dad-rasi ho to shikayat bhi baja hai