mail us but ka jidhar tir-e-nazar hota hai

maa.il us but kā jidhar tīr-e-nazar hotā hai

sūrat-e-qibla-numā dil bhī udhar hotā hai

dard siine meñ kahāñ aur kidhar hotā hai

ye to ham kah nahīñ sakte haiñ magar hotā hai

mutma.in aap raheñ ḳhauf kī kuchh baat nahīñ

kahīñ āshiq ke bhī nāloñ meñ asar hotā hai

dil huā jaatā hai jaulāñ-gah-e-yās-o-hirmāñ

dekh kis tarah se vīrāñ tirā ghar hotā hai

merī tadbīr pe hañs detī hai taqdīr mirī

naala jis vaqt ki jūyā-e-asar hotā hai

tujh ko Dar kyā hai mirā qissa-e-ġham sun to sahī

kahīñ āshiq ke bayāñ meñ bhī asar hotā hai

jāguzīñ hotā hai ik dil meñ koī parda-nashīñ

ya.anī ab rashk-e-do-sad ka.aba ye ghar hotā hai

rahm kyoñ aa.e unheñ sun ke hamārā naama

kab siyah-baḳhtoñ ke rone meñ asar hotā hai

vā.izo ka.aba kī tārīf se sābit ye huā

ki sanam-ḳhāna hī allāh kā ghar hotā hai

barg-hā-e-gul-e-tar kaise bikhar jaate haiñ

girya-e-bulbul-e-nālāñ meñ asar hotā hai

zāhid-e-gosha-nashīñ kab use pahchān sakā

vahī aarif hai jise zauq-e-nazar hotā hai

shab ko sab logoñ se poshīda janāb-e-'bedil'

aap kā jaanā ye har roz kidhar hotā hai

mail us but ka jidhar tir-e-nazar hota hai

surat-e-qibla-numa dil bhi udhar hota hai

dard sine mein kahan aur kidhar hota hai

ye to hum kah nahin sakte hain magar hota hai

mutmain aap rahen KHauf ki kuchh baat nahin

kahin aashiq ke bhi nalon mein asar hota hai

dil hua jata hai jaulan-gah-e-yas-o-hirman

dekh kis tarah se viran tera ghar hota hai

meri tadbir pe hans deti hai taqdir meri

nala jis waqt ki juya-e-asar hota hai

tujh ko Dar kya hai mera qissa-e-gham sun to sahi

kahin aashiq ke bayan mein bhi asar hota hai

jaguzin hota hai ek dil mein koi parda-nashin

yani ab rashk-e-do-sad kaba ye ghar hota hai

rahm kyon aae unhen sun ke hamara nama

kab siyah-baKHton ke rone mein asar hota hai

waizo kaba ki tarif se sabit ye hua

ki sanam-KHana hi allah ka ghar hota hai

barg-ha-e-gul-e-tar kaise bikhar jate hain

girya-e-bulbul-e-nalan mein asar hota hai

zahid-e-gosha-nashin kab use pahchan saka

wahi aarif hai jise zauq-e-nazar hota hai

shab ko sab logon se poshida janab-e-'bedil'

aap ka jaana ye har roz kidhar hota hai