malum kuchh hua hi na dil ka asar kahin

ma.alūm kuchh huā hī na dil kā asar kahīñ

aisā gayā ki pher na paa.ī ḳhabar kahīñ

aalam meñ haiñ asiir mohabbat ke har kahīñ

lekin sitam kisū pe nahīñ is qadar kahīñ

kholī thī chashm-dīd ko terī pa juuñ hubāb

apne ta.iiñ maiñ aap na aayā nazar kahīñ

juuñ ġhuncha fikr jam.a na kar Tuk tū gul ko dekh

qismat kī kho sake hai pareshānī zar kahīñ

rahne do merī na.ash ko ho jaa.e tā-ġhubār

le jā.egī uḌā ke nasīm-e-sahar kahīñ

masraf hai sab ye bālish-e-sayyād kā tire

bismil na bhariyo ḳhuun se tū bāl-o-par kahīñ

rotī hai kyā guloñ ko tū shabnam idhar to dekh

TukḌe hai is tarah se kisī kā jigar kahīñ

kartā thā kal galī meñ vo apnī ḳhirām-e-nāz

is meñ jo aa ke paḌtī hai mujh par nazar kahīñ

kahne lagā ye dekh ke ahvāl ko mire

bad-nām tū kisī ke ta.iiñ yaañ na kar kahīñ

kyā hattiyā tujhe yahīñ denī hai ai aziiz

itnā paḌā hai mulk-e-ḳhudā jā ke mar kahīñ

'qā.em' ye faiz-e-sohbat-e-'saudā' hai varna maiñ

tarhī ġhazal se 'mīr' kī aatā thā bar kahīñ

malum kuchh hua hi na dil ka asar kahin

aisa gaya ki pher na pai KHabar kahin

aalam mein hain asir mohabbat ke har kahin

lekin sitam kisu pe nahin is qadar kahin

kholi thi chashm-did ko teri pa jun hubab

apne tain main aap na aaya nazar kahin

jun ghuncha fikr jama na kar Tuk tu gul ko dekh

qismat ki kho sake hai pareshani zar kahin

rahne do meri nash ko ho jae ta-ghubar

le jaegi uDa ke nasim-e-sahar kahin

masraf hai sab ye baalish-e-sayyaad ka tere

bismil na bhariyo KHun se tu baal-o-par kahin

roti hai kya gulon ko tu shabnam idhar to dekh

TukDe hai is tarah se kisi ka jigar kahin

karta tha kal gali mein wo apni KHiram-e-naz

is mein jo aa ke paDti hai mujh par nazar kahin

kahne laga ye dekh ke ahwal ko mere

bad-nam tu kisi ke tain yan na kar kahin

kya hattiya tujhe yahin deni hai ai aziz

itna paDa hai mulk-e-KHuda ja ke mar kahin

'qaem' ye faiz-e-sohbat-e-'sauda' hai warna main

tarhi ghazal se 'mir' ki aata tha bar kahin