man mujhe apni duaon ke asar mein rakhna

maañ mujhe apnī du'āoñ ke asar meñ rakhnā

naam merā sar-e-fihrist-e-hunar meñ rakhnā

maanā dushvār salīboñ kā safar hotā hai

phir bhī tum ḳhud ko salīboñ ke safar meñ rakhnā

chāhte ho jo numā.ish na ho dāġh-e-dil kī

siikh lo ghar kī har ik baat ko ghar meñ rakhnā

dushmanī jaal bichhā.e hue baiThī hai yahāñ

kitnā dushvār hai chehroñ ko nazar meñ rakhnā

jab bhī saa.e kī zarūrat kā ho ehsās tumheñ

apnī āñkhoñ ko faqat sabz shajar meñ rakhnā

sar-bulandī kā agar shauq hai dil meñ yaaro

kuchh na kuchh tāqat-e-parvāz bhī par meñ rakhnā

shā'irī ke liye ab ye bhī zarūrī hai 'atīq'

qaum kā dard bhī tum apne jigar meñ rakhnā

man mujhe apni du'aon ke asar mein rakhna

nam mera sar-e-fihrist-e-hunar mein rakhna

mana dushwar salibon ka safar hota hai

phir bhi tum KHud ko salibon ke safar mein rakhna

chahte ho jo numaish na ho dagh-e-dil ki

sikh lo ghar ki har ek baat ko ghar mein rakhna

dushmani jal bichhae hue baiThi hai yahan

kitna dushwar hai chehron ko nazar mein rakhna

jab bhi sae ki zarurat ka ho ehsas tumhein

apni aankhon ko faqat sabz shajar mein rakhna

sar-bulandi ka agar shauq hai dil mein yaro

kuchh na kuchh taqat-e-parwaz bhi par mein rakhna

sha'iri ke liye ab ye bhi zaruri hai 'atiq'

qaum ka dard bhi tum apne jigar mein rakhna