mana bahut udas hun is zindagi se main

maanā bahut udaas huuñ is zindagī se maiñ

lekin gila karūñ bhī to kyoñ kar kisī se maiñ

hañs hañs ke kāTtā huuñ ye sahrā kī talḳhiyāñ

pesh aa rahā huuñ dekhiye dariyā-dilī se maiñ

kuchh bhī nahīñ hai vaqt kī raftār se pare

kyā kyā na ḳhvāb dekhne vaalā thā jī se maiñ

zindāñ meñ apne paañv kī zanjīr toḌ kar

pāgal sā ho gayā huuñ adhūrī ḳhushī se maiñ

aao ki ḳhatm-e-shab kā kareñ koī ehtimām

tum tīrgī se baat karo raushnī se maiñ

is 'ārzī paḌāv se jā.ūñgā meñ kidhar

manzil to pā sakā na tirī rahbarī se maiñ

'rāshid' ye hijr is qadar āsān to na thā

bahlā rahā thā dil ko magar shā.erī se maiñ

mana bahut udas hun is zindagi se main

lekin gila karun bhi to kyon kar kisi se main

hans hans ke kaTta hun ye sahra ki talKHiyan

pesh aa raha hun dekhiye dariya-dili se main

kuchh bhi nahin hai waqt ki raftar se pare

kya kya na KHwab dekhne wala tha ji se main

zindan mein apne panw ki zanjir toD kar

pagal sa ho gaya hun adhuri KHushi se main

aao ki KHatm-e-shab ka karen koi ehtimam

tum tirgi se baat karo raushni se main

is 'arzi paDaw se jaunga mein kidhar

manzil to pa saka na teri rahbari se main

'rashid' ye hijr is qadar aasan to na tha

bahla raha tha dil ko magar shaeri se main