mana ki bahut KHub hai us par ka manzar

maanā ki bahut ḳhuub hai us paar kā manzar

jaatā hai magar aag ke dariyā se guzar kar

vo buuñd batā jis pe mirā naam likhā hai

kahne ko haiñ jāgīr mirī saat samundar

aatī rahī jaatī rahī mausam kī savārī

jalte rahe shamshān magar apnī jagah par

ā.īna-e-hālāt dikhā detā hai chehra

laakh aa.e koī atlas-o-kamḳhvāb pahan kar

phūñkoñ se dhanush toḌne vaale bhī haiñ maujūd

kyā soch ke ab koī rachā.egā svayamvar

uTTho ki ye hālāt badalne haiñ hamīñ ko

ākāsh se kyā utregā ab koī payambar

vo din bhī koī duur nahīñ ai dil-e-‘nādāñ’

ye tohmateñ bhī hoñgī mirī zaat kā zevar

mana ki bahut KHub hai us par ka manzar

jata hai magar aag ke dariya se guzar kar

wo bund bata jis pe mera nam likha hai

kahne ko hain jagir meri sat samundar

aati rahi jati rahi mausam ki sawari

jalte rahe shamshan magar apni jagah par

aaina-e-haalat dikha deta hai chehra

lakh aae koi atlas-o-kamKHwab pahan kar

phunkon se dhanush toDne wale bhi hain maujud

kya soch ke ab koi rachaega swayamwar

uTTho ki ye haalat badalne hain hamin ko

aakash se kya utrega ab koi payambar

wo din bhi koi dur nahin ai dil-e-‘nadan’

ye tohmaten bhi hongi meri zat ka zewar