mana ki bahut ruh ke aazar rahenge

maanā ki bahut ruuh ke āzār raheñge

ham tere magar phir bhī talabgār raheñge

ai tishnagī-e-shauq batā ham tirī ḳhātir

kab tak yūñhī rusvā sar-e-bāzār raheñge

jal jā.eñge tapte hue sahrā meñ magar ham

auroñ ke liye sāya-e-dīvār raheñge

kab tak tirī zulfeñ hameñ zanjīr rakheñgī

kab tak tirī zulfoñ ke giraftār raheñge

nā-qābil-e-tasḳhīr irāde haiñ hamāre

ham 'azm kī ik āhanī dīvār raheñge

lekin hameñ duniyā nazar-andāz karegī

har-chand ki pesh-e-nigah-e-yār raheñge

gul honā charāġhoñ kā muqaddar hai shab-e-vasl

kab tak ye harīf-e-lab-o-ruḳhsār raheñge

'bāsit' mire afkār-o-ḳhayālāt hamesha

sharminda-e-pairāya-e-iz.hār raheñge

mana ki bahut ruh ke aazar rahenge

hum tere magar phir bhi talabgar rahenge

ai tishnagi-e-shauq bata hum teri KHatir

kab tak yunhi ruswa sar-e-bazar rahenge

jal jaenge tapte hue sahra mein magar hum

auron ke liye saya-e-diwar rahenge

kab tak teri zulfen hamein zanjir rakhengi

kab tak teri zulfon ke giraftar rahenge

na-qabil-e-tasKHir irade hain hamare

hum 'azm ki ek aahani diwar rahenge

lekin hamein duniya nazar-andaz karegi

har-chand ki pesh-e-nigah-e-yar rahenge

gul hona charaghon ka muqaddar hai shab-e-wasl

kab tak ye harif-e-lab-o-ruKHsar rahenge

'basit' mere afkar-o-KHayalat hamesha

sharminda-e-pairaya-e-izhaar rahenge