mana ki sabhi se ye chhupai nahin jati

maanā ki sabhī se ye chhupā.ī nahīñ jaatī

daulat bhī magar ġham kī luTā.ī nahīñ jaatī

ham aa.e baḌī duur se dīdār ko tere

tujh se zarā chilman bhī haTā.ī nahīñ jaatī

duniyā meñ mohabbat ke sivā aur bhī haiñ kaam

ulfat ke liye niiñd gañvā.ī nahīñ jaatī

insāf ho kaise ki 'adālat meñ kabhī jab

tasvīr sadāqat kī dikhā.ī nahīñ jaatī

us ne haiñ sahe kitne sitam kis ko hai mā'lūm

sar pe yuuñ hī duniyā ye uThā.ī nahīñ jaatī

hotā jo mire bas meñ miTā detā use par

hāthoñ kī lakīr aise miTā.ī nahīñ jaatī

maz.hab kā hasad paal ke rakkhā hai sabhī ne

par aag se ye aag bujhā.ī nahīñ jaatī

mana ki sabhi se ye chhupai nahin jati

daulat bhi magar gham ki luTai nahin jati

hum aae baDi dur se didar ko tere

tujh se zara chilman bhi haTai nahin jati

duniya mein mohabbat ke siwa aur bhi hain kaam

ulfat ke liye nind ganwai nahin jati

insaf ho kaise ki 'adalat mein kabhi jab

taswir sadaqat ki dikhai nahin jati

us ne hain sahe kitne sitam kis ko hai ma'lum

sar pe yun hi duniya ye uThai nahin jati

hota jo mere bas mein miTa deta use par

hathon ki lakir aise miTai nahin jati

mazhab ka hasad pal ke rakkha hai sabhi ne

par aag se ye aag bujhai nahin jati