mana ki tujhse dur bahut jaan-e-jaan rahe

maanā ki tujh se duur bahut jān-e-jāñ rahe

lekin tire ḳhayāl se ġhāfil kahāñ rahe

tang us pe kyoñ na vus.at-e-kaun-o-makāñ rahe

gir jaa.e jo nazar se tumhārī kahāñ rahe

mujh sā na koī kushta-e-yād-e-ḳhizāñ rahe

lamhāt-e-sar-ḳhushī bhī to mujh par girāñ rahe

sajdoñ ke baad kuchh to vafā kā nishāñ rahe

merī jabīñ rahe na rahe āstāñ rahe

yuuñ be-niyāz-e-fikr-e-bahār-o-ḳhizāñ rahe

do chaar roz jaise koī mehmāñ rahe

rāh-e-talab meñ mil na sakī manzil-e-umīd

gum-karda rāste meñ bahut kārvāñ rahe

paiham tasavvurāt-e-mohabbat kā shukriya

tum se qarīb-tar hī rahe ham jahāñ rahe

kuchh to samajh sakūñgā nasheb-o-farāz-e-dahr

achchhā hai vaqt mujh pe girāñ hai girāñ rahe

tauhīn-e-sajda hai vo agar be-ḳhudī nahīñ

jab hosh hī rahā to vo sajde kahāñ rahe

phīkī bahār bhī hai mujhe aap ke baġhair

ik aap hī hoñ saath to rangīñ ḳhizāñ rahe

uf maiñ vahāñ bhī tishna-e-zauq-e-talab rahā

labrez lākhoñ shīsha-o-sāġhar jahāñ rahe

ai 'mauj' ham ne ġharq safīna hī kar diyā

minnat-kash-e-talātum-o-tūfāñ kahāñ rahe

mana ki tujh se dur bahut jaan-e-jaan rahe

lekin tere KHayal se ghafil kahan rahe

tang us pe kyon na wusat-e-kaun-o-makan rahe

gir jae jo nazar se tumhaari kahan rahe

mujh sa na koi kushta-e-yaad-e-KHizan rahe

lamhat-e-sar-KHushi bhi to mujh par giran rahe

sajdon ke baad kuchh to wafa ka nishan rahe

meri jabin rahe na rahe aastan rahe

yun be-niyaz-e-fikr-e-bahaar-o-KHizan rahe

do chaar roz jaise koi mehman rahe

rah-e-talab mein mil na saki manzil-e-umid

gum-karda raste mein bahut karwan rahe

paiham tasawwuraat-e-mohabbat ka shukriya

tum se qarib-tar hi rahe hum jahan rahe

kuchh to samajh sakunga nasheb-o-faraaz-e-dahr

achchha hai waqt mujh pe giran hai giran rahe

tauhin-e-sajda hai wo agar be-KHudi nahin

jab hosh hi raha to wo sajde kahan rahe

phiki bahaar bhi hai mujhe aap ke baghair

ek aap hi hon sath to rangin KHizan rahe

uf main wahan bhi tishna-e-zauq-e-talab raha

labrez lakhon shisha-o-saghar jahan rahe

ai 'mauj' hum ne gharq safina hi kar diya

minnat-kash-e-talatum-o-tufan kahan rahe