manga tha humne din wo siyah raat de gaya

māñgā thā ham ne din vo siyah raat de gayā

sūraj hameñ añdhere kī sauġhāt de gayā

sikke mire ḳhulūs ke lauTā diye mujhe

apnī samajh meñ vo mujhe ḳhairāt de gayā

us ko ye zo'm thā ki hai vo shaukat-e-chaman

jangal kā ek phuul use maat de gayā

us kī hañsī meñ lai thī kisī jal-tarañg kī

mere laboñ ko pyaar ke naġhmāt de gayā

mazmūn-e-ishq par use kāmil giraft thī

nazroñ se kaise kaise havālāt de gayā

chehre se le gayā mirī pahchān chhīn kar

nā-sāzgār vaqt vo sadmāt de gayā

sab par mirī nigāh-e-karam ek sī rahī

maiñ bāñjh dhartiyoñ ko bhī barsāt de gayā

insāf mujh ko de ki na de vo magar 'shabāb'

thoḌā sā vaqt bahr-e-mulāqāt de gayā

manga tha hum ne din wo siyah raat de gaya

suraj hamein andhere ki saughat de gaya

sikke mere KHulus ke lauTa diye mujhe

apni samajh mein wo mujhe KHairaat de gaya

us ko ye zo'm tha ki hai wo shaukat-e-chaman

jangal ka ek phul use mat de gaya

us ki hansi mein lai thi kisi jal-tarang ki

mere labon ko pyar ke naghmat de gaya

mazmun-e-ishq par use kaamil giraft thi

nazron se kaise kaise hawalat de gaya

chehre se le gaya meri pahchan chhin kar

na-sazgar waqt wo sadmat de gaya

sab par meri nigah-e-karam ek si rahi

main banjh dhartiyon ko bhi barsat de gaya

insaf mujh ko de ki na de wo magar 'shabab'

thoDa sa waqt bahr-e-mulaqat de gaya